30 September, 2011

أنــــا مــن مــصــر

هذه التدوينة تدخل ضمن فعاليات مشاركتى فى يوم التدوين لمدينة المنصورة (عن الذكريات عن أجمل أماكن المدينة عن ميزاتها عيوبها ايجابيتها سلبيتها ) لكنى تخيلت أن نتفق جميعنا أبناء مصر المحروسة أن تكون لنا نفس الذكرياات وان اختلفت الاماكن فبالتالى قررت أن أكتب بشكل عام تحت عنوان أنا من مصر ..

ذكريات الصغر

تتشابه لدينا ذكرياتنا فى الصغر وان اختلفت مسميات الاماكن من مدرستى فى ابتدائى فى الشارع الفلانى لمكان عمه الى كنا بنجيب منه الحلوياات لمكان الشاارع الى كنا بنلعب فيه للمكان الى وقعت فيه ونزلت من ركبتى دم وكنت خايفه موت مفتكرش ان محدش اتعور فى ركبته او ايده او كوعه بالنسبه للولاد المكان الى اتخانقو فيه مع بعض مع ذكرى اول خناقة لاول بطحة لاول خبطة بطوبة فى الدماغ ويمكن مننا ناس سنانها اتكسرت فى خبطه من دول وبقت ذكرى فى الوجه للابد هاهاها ..
مدرسة اعدادى ومراحل المراهقة لبيت اول بنت يدقلها قلبى (ده بالنسبة للولاد طبعا ) كنت بتذنب تحته عشان اشوفها للنادى الى ياما ضيع وقتى بالساعات فى ممارسة رياضه معينه او لمجرد اللف فيه تضيع وقت ورغى مع صحابى .. لمكان الدرس اها كلنا كنا بناخد دروس خصوصى طبعاا لمكان لعب كرة القدم تقولشى عيال حريفة وسادين الشارع من الناحيتين ومصدعين الجيران كمان ..
للمكان الى كلنا كنا بنصلى فيه العيد من الطفولة لمرحله المراهقة والجامعة ويمكن كمان لحد الوفاة انا شخصيا عندنا بنصلى العيد فى مكان واحد واعتقد اننا كلنا كدا .

يعنى مشتكرين كلنا فى نفس الذكريات مع اختلاف المسميات وجايز دى نشترك فيها برده لان مفيش بلد مفيهاش شارع الجيش او بورسعيد ومدرسة جمال عبد الناصر او قاسم امين او مبارك او السادات ..

حنينى لبلدى هوه حنينى لذكرياتى فيها جايز متكونشى احسن بلد فى مصر كلها ولا هيه معروفة وبيجيلها السيااح بس بالنسبة لى بلدى الحلوة وزى مكلنا مشتركين فى الذكريات هنلاقى مشتركين برده فى السلبيات الى منتشرة بشكل كبير فى اى حته فيكى يا محروسة .

القمامة

يعنى القمامة الى ماليه الشواارع غير مقبول وكل مدى للاسوأ لا والكوميديا فى الموضوع انهم بيستعينو بخبراء اجانب عشان يحلو المشكله الصعبه اوى دى انا شايفاها مشكله بسيطه وحلها ابسط يعنى عمال النظافه يواظبوا على شيل القمامة من الشاارع ونجيب باسكيت كبير فى كل شارع وحارة الناس تجمع فيه القمامة ويجى عامل النظافه 3 مرات فى اليوم دوريات يشيلو القمامة والقصه هتنتهى ببساطه كل وااحد يشو شغله الناس مترميش فى الشارع وعامل النظافه يجى ينظف الشارع ويشيل القمامة هيه صعبه فى ايه بجد مش عارفه ده حتى الناس الى شغالين فى موضوع تقسيم انواع القمامة دول بيكسبو دهب يعنى منها نظافة وعز ونغنغة :)

عندنا شوارع كثير رئيسيه وغير رئيسية متبهدله من الحفر مرة للغاز الطبيعى ومرة للصرف الصحى ومرة تلكيكة وخلاص وبعد ما الشغل يخلص ممكن الشارع يقعد شهور حالته متبهدله كدا والعربيات تبوظ من الشارع الى كله هضاب ومنخفضات ومرتفعات والناس نفسها بتتعب من المشى المهم بعد عناء من المشى وشكاوى من المواطنين يجو يرصفوا الشاارع ودى حاجه كويسه بس كلنا برده عارفين وواثقين انهم تانى يوم هيفتحو فتحه فى نص الشاارع ويبوظوه تانى غلاسه وخلاص اه تلكيكة مفيش شارع اترصف الا بعدها اتفتح ليه معرفش هيه مشكله يعنى لما يشوفو شغلهم ؟!

الباعة الجائلين او العشوائين

منتشرين فى أماكن كثير ويمكن بعد الثورة الحاله يمكن بقت سايبة شوية المهم تيجى الحملة تشيل عربيااتهم وبضاعتهم وحاله هرج ومرج فى الشاارع وبعدين تمشى الحملة ويرجع الوضع كما كان ده غير باه ان بتبقى فى اغلب الاوقات معروفة ان فيه حملة فى محلات باه بتريح دماغها وتقفل اليوم ده لحد ما القلق يمشى طب ايه الحل نعملهم سوق ومكان مغطى محترم ويكون فى مكان حيوى برده وميبقاش غالى عليهم وهما هيروحو هناك بكل بساطه ويبقى فى امين شرطه ولا اى واحد له صفه امنيه موجود فى الشارع باستمرار منه امااان للشاارع واى حد بيفكر يعمل حاجه نص كم يبقى عارف ان فيه رقابة مهو اصل احنا لازم نمشى بالرقابة شويه والخوف بدليل ان لما كان المخالف بيدفع غرامة الف جنيه وش كدا مكنش حد بيمشى مخالف تعال دلوقتى اتفرج ع الشارع بقه اربع اتجاهات هاهاها حاجه سبهلله خااالص ..

التوك توك

البتاع ده الى محدش عارفه يوصفه يقول عليه اه معرفش مين ابن الحلال الى راح الهند عجبه التوك توك راح مستورده يعنى هوه معجبوش فى الهند غير التوك توك ساب البلد الى تعليمها متطور والسينما مبقتش زى زمان اتطورت وبقت بتدخل فى مهرجانات وتاخد جوايز وساب انها عندها مشروع نووى كل الى عجبه التوك توك ماعلينا هوه حاجه كدا لا هوه عربية ولا هوه موتوسيكل ولا هوه عجله بيمشى فى اجدعها شارع جنب اكبرها عربيه مخالف تلاقى فى حارة تلاقى فى اشارة تلاقى حاجه كدا زئردة ماشيه وراشقه فى اى حته بتخض انا منه والله البتاع دى هوه صحيح بينفع فى القرى لضيق شوارعها لكن بقت سبهلله خالص دلوقتى وماشى فى اى حته وظهر عندنا التوك توك مستفز اووى شكلا وموضوعاا بس للامانه انا جربت ركوبه لا واتصورت كمان هههه محدثه باه تقولو ايه المهم ركوبه ممزوج باحساسين واحد خوف انك ممكن تلبس فى اى حاجه قدامك فى اقل من ثانيه ومتعه انك راكب مواصله وفى نفس الوقت حاسس انك ماشى على رجلك فى الشارع وشايف كل حاجه  متسالنيش ازاى روح جرب اركبه وانت هتعرف :)))
التوك توك وسيله فى القرى كويسة لكن فى بلد او مدينه كبيرة ده خطأ فادح يعنى من اولها ميخادش تصريح انه يمشى فى المدينة وكمان عاوزة مراقبه برده من بتوع المرور وياخدو غرامات والدنيا هتتظبط :)

انا اسفه الموضوع طويل لكن انا كان عندى شويه كلام وقلته انا وانت وهيه من مصر للمنصورة لاسوان لاسيوط لحتى حلايب وشلاتين عندنا نفس الحب لبلدنا وعندنا نفس الذكريات ونفس السلبيات عاوزين نعالجها ..

نقطة اخيرة كنت من فترة فى منطقة مصر الجديدة وروكسى وقد ايه منطقه معمارها فوق من الراائع وفى منها عمارات فى وسط البلد معمارها جميل اوى وفى فن رائع يبهر العين ليه متكونش كل بلد وكل مدينه وكل قريه وكل محافظه مميزة بمعمارها كدا ليه لا حلم غريب بس جميل يعنى بلاد النوبة مميزة بمعمارها وبيوتها كذا بعض المناطق فى الواحات ودى حاجه كويسة وجميله ياريت كل بلد فيها شكل جمالى ومعمار مميز مش قصه طوبه على طوبة وشويه خرسانه ومسلح وخلاص خلصنااا ......

مصر المحرووسة عليها شويه تراااب عاوزين يتشاالو لو الترااب ده اتشااال مصر هتبقى جميله اوى

6 comments:

  1. This comment has been removed by the author.

    ReplyDelete
  2. جميل اوي اوي
    وعموما انا لسه عايش في المنصوره
    ما بين قريتي وبين جامعة المنصوره قصص وحوايت كتير :)
    بس اكيد مش هجيب اكتر من اللي قولتيه
    تسلم ايدك
    والمدونه حلوه اوي

    ReplyDelete
  3. very very nice
    el mansoura gamela gedn
    ana menha
    bs moshkeltha el za7maa

    ReplyDelete
  4. رائعة

    إحنا بنعرف ننتقد كويس لكن بنتكسف من الفعل على أرض الواقع كشعب ، اليوم اللى نزلت أكنس فيه الشارع و انا فى الجامعه و أشيل الزبالة بنفسى تم إنتقادى من أهلى و الجيران قالولى ده شغل الزبال و عيب تعمل كده

    اليوم اللى كلنا منرميش الزبالة من شباك العربية إعرفى إننا حننضف و نحافظ على نضاقة بلدنا

    تكسير الأسفلت
    ------------
    إعلمى يا عزيزتى إنه فى كل تعاقد بند ينص على إعادة الشىء إلى أصلة يعنى الشارع يرجع زى ما كان و إنه فى جهه بتستلم من المقاول على الأساس ده و مجرد عدم عودة الشىء لأصلة معناه تواطؤ الحهة المستلمة مع المقاول و تكلفتة البند الأخير ده اللى بالتأكيد بيخسرة كتير ... يعنى كلمة السر فساد مالى

    تحياتى لبنت المنصورة

    مهندس حاتم أبوزيد
    شركة بتروجت
    بعيد عن المنصورة من 10 سنين لظروف العمل و بنزلها فى الأجازات .. توريل

    ReplyDelete
  5. Ana Men Mansoura
    Ante Mnen Men El Mansoura ?

    ReplyDelete