حكاوى أسمايا: طـفـطـافـيـتـو رأس البر

معلومة كدا عالماشى .....

تقع راس البر فى شمال القاهرة على البحر المتوسط وتبعد عن القاهرة حوالى 250 كيلو تتبع محافظة دمياط .

مصيف راس البر مميز جدا ومختلف ازاااى هقولك ..

يعنى بتحجز فيلا دور أرضى بحديقة حلوة كدا تنزل تشرب فيها الشاى او نقعد نلعب كوتشينة ويا حظه الجامد الى يقع الشايب فى حظه بياخد احكام تغيظ أووى

او نلعب دومينو او الاطفال كورة فى ملعب صغنن محندق لذيذ الجو ده .

اها الفيلا دى زمان كان اسمها عشش هههههه متستغربوش اه عشش وكانت مصنوعة من حصر البردى.

شوارع راس البر باه اسماءها مميزة برده الى غالبها بيكون ارقام (33؛ 45 ؛ 101 ؛65 ؛ 63 ) وياسلام باه معظم الشوارع كانت زمان رمل مش مرصوفه يعنى بس رملة حلوة كدا .

الطفطف وسيلة النقل السياحية الجميلة الى كانت بتتميز بيها راس البر والعجل وتاجير العجل ومحاولتى المستميته انى اعرف اسوق العجلة الطبيعيه زى بقيت الناس بس للاسف باءت محاولتى بالفشل وكان اخرى العجلة ابو سنادتين واكيد لازم فى الاول زقة !!!

الباعة الجائلين

مفتكرش انك هتلاقى منهم فى مكان تانى وتحبه كدا يعنى من الصبح تلاقى عم عبده بتاع الفوول ينادى ويقول فووووووووول حد عايز فووووووووول ! ويجى بعده بتاع الجرايد يقول جرايد جرايد وماشاءالله صوتهم رنان لو نايم متأخر يصحوك من أحلها نومة وهتبقى مبسوط ! يجى باه عالظهر وقت تحضير الغدا يعدى بسمك جمبرى او ام الخلول ممم لذيذة . نوصل لبليل باه يجى ينادى واحد ويقول تسالى تسالى طعم تانى محمد ورشا تسالى تسالى . بص هتلاقى كل حاجة جايلاك لحد عندك وانت عليك تنقى وتختار بذمتك هتلاقى ده فين تانى غير راس البر .

لو خرجت بليل اكيد هتنزل منطقة اللسان التى ينطبق عليها الاية القرانية (ومرج البحرين يلتقيان بينهما برزخ لا يبغيان ) تبارك الخالق سبحان الله .

والفنار اكيد وهتنزل شارع الجربى وشارع النيل وهتحضر سيرك وانا منصحكش بحضوره ههههههه

لو مكسل تنزل يبقى اكيد هتحضر عرض السينما الصيفى يعرض 4 افلام من افلام السينما الجديدة منك للبحر كدا علطول وبسعر رمزى جدا .

اما باه لو نويت تقعد ومخرجتش فمتقلقش هتتسلى هتتسلى هتلاقى شباب يركبو عجل وناس رايحه وناس جاية وشباب راكبين عربيات وبيعملو خمسات وتلاتات وستينات هههههههههه جو كدا يعنى شباب باه بيروش خليك فريش احنا فى مصيف ولازم يمضى حضور وانصراف فى الشوارع الرئيسية (33؛ 101 ؛45 ) وشارع اللسان طبعاااااااااااا

يا خبر كنت هنسى اوعى تروح راس البر ومتاكلش حواوشى من عند أبو خالد ولا فطير من عند دعدور كلهم حلوين ومشبك لا يعلى عليه .....