الآنسة الموظفة ^_^

احم احم ايونز انا الآنسة الموظفة 

شاء القدر انى اتوظف فى الحكومة بشكل خاص فى وزارة الثقافه بشكل خاص اوى اوى فى قصر الثقافة فى بلدى ^_^

وحياة طنط فكيهه انا اصلا مكنتش اعرف ان عندنا قصر ثقافة 

المهم اول يوم استلام عمل كان يوم 17\11\2011 نزلت من بيتنا الساعه تقريبا تسعه وبدات اول خطواتى الى منحنى اخر من حياتى وفضلت امشى امشى على حسب الوصف وملقتش القصر برده سالت وتوهت المهم وصلت لمكان كدا اشبه بالوصف بمكان مهجور اى والله زى ما بقولكوا كدا مهجوووووووور .... 

دخلت المبنى او مش مبنى بالمعنى الدقيق مبنى تقدر تقول مممم هوه مالوش وصف هوه حاجه كدا من دور واحد واربع اوض ومطبخ وحمامين ها توصفه بايه ده باه انا كنت فاكراه قصر يا ناس فين القصر طيب فين البلكونات طب فين الحاجات الفخيمة طب بلاش فين الباركية طب فين الشبابيك او المناور حتى اه انا اضحك عليا ولا ايه .. روحونى انا عاوزة اروح اه يانى ..

فى جولة سريعه اتعرفت على الموظفين وكان اول كلمة تتقالى انتى ايه جابك هنا ؟ :O انا ساعتها جالى احساس بالخنقة وكنت هعيط فعلا وسالت نفسى نفس السؤال فى لحظتها انا ايه جابنى المكان المهجور ده والتزمت الصمت لباقى اليوم وجلست كمتفرجة 

وتوالت ايام ذهابى للعمل وتجنبى كل زملائى افعل ما يطلب منى بقرف شديد وان كان التعبير مبالغ فيه بتكبر :(( 

توالت الايام وبدات اخد على مرواح الشغل كل يوم بدات اخد على اشكال الموظفين وبدات اخد على رداءة المكان وكنت بصبر نفسى واقول كل الاماكن الحكومية كدا بدات اتقرب الى زملائى فى العمل لكن فى حدود ..

بعد استلامى للعمل بشهرين جه حوالى ستة موظفين جداد تعين اوائل الجامعه فنون تطبيقيه وفنون جميله على مراحل انا كنت فرحانه اوى من جوايا اخيرا لقيت حد دماغى وبدا حبى للعمل يكبر وبدا ادائي فى العمل يتحسن وبدات احب المكان رغم رداءته وبدات احس بالانتماء وبدا بشاير بناء مبنى جديد على مستوى عالى بس شوية اجراءات واقفه يعنى باعتبار ان يوم الحكومة بسنة هاهاها بس الامل حلو برده ..

بتوالى الايام بدانا نبقى اصحاب اوى ونتشارك الافكار والاراء لتطوير العمل وبقى بينا علاقه اسرية عمل حلوة اوى مفيش حاجه اسمها ده شغلك او شغلى فى اننا كلنا بنكمل بعض وكلنا مسئولين ^_^ 

اصحابى الجداد هبه وامانى وايناس وولاء حبيتهم حبيتهم مفيش كلام بالاضافه لنهى عسل عسل واشواق هانم الكبيرة بتاعتنا ^_^

بس بشكل ما انا ليا اسلوبى الى بدا ينتشر فى المكان هههههه ايوا ايوا انا اصلى ليا بصمة فى كل حته انا ليا ستايل مميز كدا فى كل حاجه وولله الحمد ^_^ 

الحمدلله انى اتعرفت على اصحابى الجداد الحياة بقى لونها احلى .. الحمدلله ان بقى ليا وظيفه والمكان صحيح مش قد المقام بس ممكن اول ما اتثبت انقل فى اى حته احلى وارقى ;)  .. الحمدلله الحمدلله الحمدلله 

رحلتى الى الكويت

احم احم

مشعارفه ارغى ولا احكى الحدوتة بالتفصيل ممم تعملى ايه يا سوسو اقولكوا انا هرغى وانتوا وحظكوا

فى يوم كدا مشفاكراه لقيت اخواتى بيكلمونى انهم حجزولى تذكرة الى الكويت والزيارة جاهزة وكله تمام ايه ايه يا جدعان انا هتكروت ولا ايه خدونى بشويش كويت ايه وبتاع ايه دى انا عندى شغل مينفعش اغيب خالص واسيب ماما لوحدها ازاى يعنى !!

يوووووووه بطلى رغى خلاص تعالى عشر ايام بس عشان الشغل رفضك ممنوع هتيجى يعنى هتيجى احنا اخواتك ووحشتينا وعاوزين نفسحك ممم طب طب طب مفيش طب الطيارة يوم الخميس الساعه 9 ^_^

انا بينى وبين نفسى كنت فرحانه دى اول مرة اطير فيها خارج مصر :$ بس الشغل وماما وبابا مش متعودين غيابى عن البيت كدا بس خلاص ملهاش حل تانى هروح وامرى لله

المهم يوم السفر كله تمام شنطى وانا جاهزة ومش هطول عليكوا وصلت المطار متاخره جدا وكنت متوترة جدا لانها اول مرة ليا سفر ولوحدى ومعرفش ايتها حاجه فى ايتها حاجه

بس تقول ايه باه ربنا وقفلى ولاد الحلال من اول الموظف الامور الى عند الوزن ده فضل يشرحلى هعمل ايه وهروح فين وبعدين ظابط تانى كدا ملالى ورقه خضرا كدا وبعدين وقفت عند الجوازات شفت تامر حبيب وكان بيبصلى ويضحك ولانى متوترة ومش فى دماغى اتصور معاه او اكلمه والحوارات دى كنت عامله نفسى من بنها ومش مدياله اهمية ولا اكنى اعرفه اصلا هههههههه

المهم وصلت الطيارة كدا ياه ياه كنت فرحانه اوى انا اصلى زى الاطفال بفرح من اقل حاجه وكان مكانى جنب الشباك طبعا وكان جنبى ولد مصرى وولد كويتى بس المصرى كان غتت بطريقه مستفزة يعنى كان نفسى اديله بوكس انما الكويتى ده ده ده ايه العسل ده حاجه كدا ذوق اوى صراحه وهادى حببنى فى اهل البلد من قبل ما انزلها وفضل معايا وشالى الشنطة وكان وشه فى ابتسامة حلوة وسابنى باه وانا بختم الباسبور..

لفت نظرى ان المطار هادى مفيش زحمة شفت اخواتى وكان فى استقبالى هوبة الى زى السكر حبيب قلب خالتو ^_^

البلد حلوة جدا هادية نضيفه تقريبا كنت بره معظم الوقت الصبح بنزل مع اختى شوبينج وكدا بنات باه وبليل اخويا بيفسحنى فى اماكن مختلفه لفت نظرى ان العماله هناك تقريبا كلها فلبينين بس ذوق جدا الابتسامه مش بتفارقهم .. وتنوع الجنسيات حلو برده يعنى تشوف الهندى الامريكى المصرى السورى ..

الحياة هناك سهله اوضتى كانت بتطل على الخليج ياحلاوة يا ولاد فى مكان احلى من كدا ^_^

البيت بيطل على الخليج ونادى القادسية لا وكمان بنشوف الابراج بس من بعيد طبعا ^_^

قضيت يوم عند اسرة كويتية وكنت سعيدة جدا بالتعرف على اشخاص جدد والتعرف على عادات المجتمع الكويتى ^_^

قضيت عشر ايام حلوين اتفسحت وغيرت جو بكل معنى الكلمة والحمدلله

اول ما رجعت مصر وركبت الاتوبيس من الطيارة للمطار يانهار وانا اتخنقت وحسيت بالتراب والصداع والوش وانتظرت الشنط وقت طويل جدا من الاخر حسيت بالفرق من وانا فى المطار ..

المهم يلا هنزلكوا شوية صور حلوة عشان تبقوا اتفسحتوا معايا وعامة انا كنت بنزل على انستجرام كل الصور اول باول ^_^

الصور فى لينك فليكر http://www.flickr.com/photos/asmaaia/

كلنا عندنا فراغ عاطفى بس مبنقولش عالنت ^_^

أبدأ ازاى طيب ! ماهو الجواب باين من عنوانه ..

هتكلم بصيغة الأنا عن لسانى بس أنا على ثقة ان ده لسان حال بنات كثير وولاد كثير :)

نفسى احب واتحب واعيش حياتى مع شريك حياة انا اختاره هوه يختارنى المهم ان يبقى فى اختيار يحبنى عشان انا انا اسماء عيوبها قبل مميزاتها يحتوينى يفهمنى يشاركنى فرحى وزعلى اتكلم وارغى وميقوليش اسكتى :|

طب ودى هيجى ازاى يا اسمايا مينفعش الا فى اطار شرعى الى هوه خطوبة جواز وهكذا .. -.-

غلطت انا لما كان عندى قناعة ان مفيش ارتباطات فى الجامعه وتظبيط ؟ غلطت وعلى حسب كلام اصحابى انى خيبه ومشعارفه اوقع عريس ؟ غلطت لما كنت بقول لا ؟
عارفه ان لا قفلت عليا طرق كتير بس دى انا معرفش اكون الا انا :|

تقولوا غبيه تقولوا بتتكسفى تقولوا غلطانة تقولوا متسرعه تقولوا طفله .. اهو دى أنا

وهيه البنت تفتكروا عاوزة تتجوز عشان تغير حاله البطاقة من عزباء الى متزوجة وتتمنظر قدام صحابها بالدبلة !! لا غلط هيه عاوزة شريك حياة مش عاوزة خيال مآتة ..

عارفه ان الحياة مع الطرف الثانى فيها مشاكل ومش مثالية ومش كلها نحنحه وسهوكة بس اهى بتدى طعم للحياة بتدى لون للايام

احساسك بالوحدة شعور سخيف ولما تحس بالخنقة وحد يسالك مخنوق ليه هتحكى تقول ايه .. عندى فراغ عاطفى !!

ومحدش يتفزلك ويقولى ما الاهل والصحاب موجودين اهو لا مش هما الاجابة الصحيحة الى هتتحط فى المربع الفاضى والمدرس يعلم عليها صح -.-

هييييه تنهيدة

عارفين بعد الرغى ده هعمل ايه ابتسامة صغيرة وهقفل اللاب توب واكمل حياتى عادى ماهو انا اصلى عندى قناعه وايمان بالله ان كل حاجه قسمة ونصيب بس ده لا يمنع من شوية فضفضه



                                 ^_^

أنــــا مــن مــصــر

هذه التدوينة تدخل ضمن فعاليات مشاركتى فى يوم التدوين لمدينة المنصورة (عن الذكريات عن أجمل أماكن المدينة عن ميزاتها عيوبها ايجابيتها سلبيتها ) لكنى تخيلت أن نتفق جميعنا أبناء مصر المحروسة أن تكون لنا نفس الذكرياات وان اختلفت الاماكن فبالتالى قررت أن أكتب بشكل عام تحت عنوان أنا من مصر ..

ذكريات الصغر

تتشابه لدينا ذكرياتنا فى الصغر وان اختلفت مسميات الاماكن من مدرستى فى ابتدائى فى الشارع الفلانى لمكان عمه الى كنا بنجيب منه الحلوياات لمكان الشاارع الى كنا بنلعب فيه للمكان الى وقعت فيه ونزلت من ركبتى دم وكنت خايفه موت مفتكرش ان محدش اتعور فى ركبته او ايده او كوعه بالنسبه للولاد المكان الى اتخانقو فيه مع بعض مع ذكرى اول خناقة لاول بطحة لاول خبطة بطوبة فى الدماغ ويمكن مننا ناس سنانها اتكسرت فى خبطه من دول وبقت ذكرى فى الوجه للابد هاهاها ..
مدرسة اعدادى ومراحل المراهقة لبيت اول بنت يدقلها قلبى (ده بالنسبة للولاد طبعا ) كنت بتذنب تحته عشان اشوفها للنادى الى ياما ضيع وقتى بالساعات فى ممارسة رياضه معينه او لمجرد اللف فيه تضيع وقت ورغى مع صحابى .. لمكان الدرس اها كلنا كنا بناخد دروس خصوصى طبعاا لمكان لعب كرة القدم تقولشى عيال حريفة وسادين الشارع من الناحيتين ومصدعين الجيران كمان ..
للمكان الى كلنا كنا بنصلى فيه العيد من الطفولة لمرحله المراهقة والجامعة ويمكن كمان لحد الوفاة انا شخصيا عندنا بنصلى العيد فى مكان واحد واعتقد اننا كلنا كدا .

يعنى مشتكرين كلنا فى نفس الذكريات مع اختلاف المسميات وجايز دى نشترك فيها برده لان مفيش بلد مفيهاش شارع الجيش او بورسعيد ومدرسة جمال عبد الناصر او قاسم امين او مبارك او السادات ..

حنينى لبلدى هوه حنينى لذكرياتى فيها جايز متكونشى احسن بلد فى مصر كلها ولا هيه معروفة وبيجيلها السيااح بس بالنسبة لى بلدى الحلوة وزى مكلنا مشتركين فى الذكريات هنلاقى مشتركين برده فى السلبيات الى منتشرة بشكل كبير فى اى حته فيكى يا محروسة .

القمامة

يعنى القمامة الى ماليه الشواارع غير مقبول وكل مدى للاسوأ لا والكوميديا فى الموضوع انهم بيستعينو بخبراء اجانب عشان يحلو المشكله الصعبه اوى دى انا شايفاها مشكله بسيطه وحلها ابسط يعنى عمال النظافه يواظبوا على شيل القمامة من الشاارع ونجيب باسكيت كبير فى كل شارع وحارة الناس تجمع فيه القمامة ويجى عامل النظافه 3 مرات فى اليوم دوريات يشيلو القمامة والقصه هتنتهى ببساطه كل وااحد يشو شغله الناس مترميش فى الشارع وعامل النظافه يجى ينظف الشارع ويشيل القمامة هيه صعبه فى ايه بجد مش عارفه ده حتى الناس الى شغالين فى موضوع تقسيم انواع القمامة دول بيكسبو دهب يعنى منها نظافة وعز ونغنغة :)

عندنا شوارع كثير رئيسيه وغير رئيسية متبهدله من الحفر مرة للغاز الطبيعى ومرة للصرف الصحى ومرة تلكيكة وخلاص وبعد ما الشغل يخلص ممكن الشارع يقعد شهور حالته متبهدله كدا والعربيات تبوظ من الشارع الى كله هضاب ومنخفضات ومرتفعات والناس نفسها بتتعب من المشى المهم بعد عناء من المشى وشكاوى من المواطنين يجو يرصفوا الشاارع ودى حاجه كويسه بس كلنا برده عارفين وواثقين انهم تانى يوم هيفتحو فتحه فى نص الشاارع ويبوظوه تانى غلاسه وخلاص اه تلكيكة مفيش شارع اترصف الا بعدها اتفتح ليه معرفش هيه مشكله يعنى لما يشوفو شغلهم ؟!

الباعة الجائلين او العشوائين

منتشرين فى أماكن كثير ويمكن بعد الثورة الحاله يمكن بقت سايبة شوية المهم تيجى الحملة تشيل عربيااتهم وبضاعتهم وحاله هرج ومرج فى الشاارع وبعدين تمشى الحملة ويرجع الوضع كما كان ده غير باه ان بتبقى فى اغلب الاوقات معروفة ان فيه حملة فى محلات باه بتريح دماغها وتقفل اليوم ده لحد ما القلق يمشى طب ايه الحل نعملهم سوق ومكان مغطى محترم ويكون فى مكان حيوى برده وميبقاش غالى عليهم وهما هيروحو هناك بكل بساطه ويبقى فى امين شرطه ولا اى واحد له صفه امنيه موجود فى الشارع باستمرار منه امااان للشاارع واى حد بيفكر يعمل حاجه نص كم يبقى عارف ان فيه رقابة مهو اصل احنا لازم نمشى بالرقابة شويه والخوف بدليل ان لما كان المخالف بيدفع غرامة الف جنيه وش كدا مكنش حد بيمشى مخالف تعال دلوقتى اتفرج ع الشارع بقه اربع اتجاهات هاهاها حاجه سبهلله خااالص ..

التوك توك

البتاع ده الى محدش عارفه يوصفه يقول عليه اه معرفش مين ابن الحلال الى راح الهند عجبه التوك توك راح مستورده يعنى هوه معجبوش فى الهند غير التوك توك ساب البلد الى تعليمها متطور والسينما مبقتش زى زمان اتطورت وبقت بتدخل فى مهرجانات وتاخد جوايز وساب انها عندها مشروع نووى كل الى عجبه التوك توك ماعلينا هوه حاجه كدا لا هوه عربية ولا هوه موتوسيكل ولا هوه عجله بيمشى فى اجدعها شارع جنب اكبرها عربيه مخالف تلاقى فى حارة تلاقى فى اشارة تلاقى حاجه كدا زئردة ماشيه وراشقه فى اى حته بتخض انا منه والله البتاع دى هوه صحيح بينفع فى القرى لضيق شوارعها لكن بقت سبهلله خالص دلوقتى وماشى فى اى حته وظهر عندنا التوك توك مستفز اووى شكلا وموضوعاا بس للامانه انا جربت ركوبه لا واتصورت كمان هههه محدثه باه تقولو ايه المهم ركوبه ممزوج باحساسين واحد خوف انك ممكن تلبس فى اى حاجه قدامك فى اقل من ثانيه ومتعه انك راكب مواصله وفى نفس الوقت حاسس انك ماشى على رجلك فى الشارع وشايف كل حاجه  متسالنيش ازاى روح جرب اركبه وانت هتعرف :)))
التوك توك وسيله فى القرى كويسة لكن فى بلد او مدينه كبيرة ده خطأ فادح يعنى من اولها ميخادش تصريح انه يمشى فى المدينة وكمان عاوزة مراقبه برده من بتوع المرور وياخدو غرامات والدنيا هتتظبط :)

انا اسفه الموضوع طويل لكن انا كان عندى شويه كلام وقلته انا وانت وهيه من مصر للمنصورة لاسوان لاسيوط لحتى حلايب وشلاتين عندنا نفس الحب لبلدنا وعندنا نفس الذكريات ونفس السلبيات عاوزين نعالجها ..

نقطة اخيرة كنت من فترة فى منطقة مصر الجديدة وروكسى وقد ايه منطقه معمارها فوق من الراائع وفى منها عمارات فى وسط البلد معمارها جميل اوى وفى فن رائع يبهر العين ليه متكونش كل بلد وكل مدينه وكل قريه وكل محافظه مميزة بمعمارها كدا ليه لا حلم غريب بس جميل يعنى بلاد النوبة مميزة بمعمارها وبيوتها كذا بعض المناطق فى الواحات ودى حاجه كويسة وجميله ياريت كل بلد فيها شكل جمالى ومعمار مميز مش قصه طوبه على طوبة وشويه خرسانه ومسلح وخلاص خلصنااا ......

مصر المحرووسة عليها شويه تراااب عاوزين يتشاالو لو الترااب ده اتشااال مصر هتبقى جميله اوى

يــومـا للـخـلـف

كعادتى أتصفح موقع الفيس بوك يوميا لمتابعة اخبار اقاربى واصدقائى وجدت رسالة من صديقه قديمة لى من ايام الجامعة تطالبنى برقم هاتفى المحمول(انا اصلى بغير رقمى علطول ) ماعلينا بعته لها وعلى اثره كلمتنى ان فرحها قرب وعاوزة تلف على فستان الزفاف الابيض طبعا وافقت علطوول وافقت انى الف ع المحال والاتيليهات ده لف متعب بس لذيذ عقبالكو جميعا.

المهم تانى يوم صحيت بدرى وعلى اتم استعداد للقاء صديقتى التى لم ارها منذ خمس سنوات تقريبا ياااه انقضى وقت طويل جدااا وجدتها تنتظرنى متالقه كعادتها شكليا كان لقاءنا عادى شبيه بتركنا بعض البارحه ورؤيتنا لبعض مرة اخرى ولكن قلوبنا كانت تتراقص فرحا انا اشعر بذلك وكذلك هى توجهنا للميكروباص وركبنا ومنذ تلك اللحظه وتحدثنا عن كل هذه السنوات الماضيه وتلك الاحداث الشيقه لم نهتم لعدد الركاب ولا لحوارنا ان كان لائقا انا نتحدث فى الميكروباص ام لا تلك كانت عادتنا قديما ومازلت نحن منذ ايام الجامعه عند تجمعنا ننسى عمرنا وننسى الناس من حولنا ونهتم فقط بتلك اللحظه وسعادتنا فيها واعتقد ان كل الميكروباص عرف حديثنا هاها (هوه ده رغى البنات).

وصلنا روكسى وطلعت الموبايل وبدات بتصوير تلك المعالم الرائعه وتلك المنطقة الراقيه وهذا المعمار الجميل البديع استغربت صديقتى جدا قلت لها هوايه حديثه لى احب تصوير تلك البنايات القديمه او المناظر الطبيعيه المختلفه ايتغربت وقالت لى تغيرتى كثيرا وكانت بتغلس عليا من حين لاخر عشان معرفش القط صور كويسه التقينا بصديقة اخرى وهكذا بدات رحلتنا فى البحث عن فستان .

تمشينا فى شوارع روكسى وشوارع عباس العقاد ومن هذا المحل للاخر نتهادى بين العربات كالفراشات الرشيقه نفادى هذا الميكروباص وهذا الاتوبيس وجرى خفيف لحسن العربيه المعفنه دى تخبطنا ونهدى شوية عند عربيه شيك مش مهم اموت بس المهم اموت تحت عربيه نضيفه هاها(تفاهه عيال) كنت ارى بعض السخرية من المارة او الاستغراب  من البنات التى تتصرف وكانها كالاطفال كان وقت اكثر من رائع يوم اكثر من جميل من المسلى ان تكون لك اصدقاء فى كل مرحله من حياتك فتلك المرحله من حياتى كلما التقيت باصدقائى انسى عمرى الحقيقى وارجع لما كنت عليه من ذى قبل فتاه صغيرة حمقاء ربما لا تهتم استرجعنا بعض الذكريات وضحكنا كثيرا ومرحنا كثيرا

ملحوظة صغيرة (اختارت الفستان اوف وايت) مع اعتراضى على لونه لانى اتخيل العروسة باللون الابيض فقط لا غير

كان يوما للخلف يوما فيه ذكريات الماضى وسعاده تلك الفترة

هـات ورقـة وقـلـم وكـشـكـول

انت عندك كام سنة ؟ ايه بتبص فين ايوا ايوا انت يالى قاعد ع الجهاز وبتقرا الصفحه دى ..

اى كان عمرك كام تقدر تقولى عيشت حياتك الى فاتت ازاى مستغرب ليه مفهمتش سؤالى طب طب براحه هوضحلك عمرك خططت لحياتك قبل كدا؟ ولا عايش حياتك وزى ما تيجى تيجى والى يجيبه ربنا كويس وهعمل ايه نصيبى كدا وحطيت ايدك على خدك وقلت ايه العمل ؟!.

حاسس انك ضيعت سنين عمرك فى حاجات تافهة وغبية ملهاش لازمة حاسس انك حاجة كدا ملكش لازمة فى الحياة طب عمرك سألت نفسك قبل كدا انا ايه الى جابنى وعايش ليه ؟!.

هقولك انت عارف رسالتك ايه فى الحياة ؟؟؟؟

عشان كدا قلت فى الاول هات ورقة وقلم وكشكول ماشى يا سيدى ركز باه معايا

ارسم مثلا وليكن دايرة فى الورقه الاى كلام الى انت جبتها وعايزين نقسمها (جزء روحانى وجزء الحياة العامة وجزء الحياة العمليه

تيجى عند كل جزء وتدى نفسك رقم من عشرة قيم نفسك يعنى فى الجزء الروحانى علاقتك بربنا ايه ؟ فى الحياة العامه انشطة الخير عندك كام من عشرة ؟ العمل كام من عشرة ؟ وهكذاااا طب دلوقتى بامانه شديدة ومصارحه مع النفس قيمت نفسك طب شايف تقيمك لنفسك ده اداك قسمه فعلا لنفسك ولا اكدلك انك مبتعملش حاجه مهمه وانجاز فى حياتك طب بالراحه برده متزعلش كل حاجه ممكن تتصلح ظبط بس افكارك فى راسك باه وهات باه كشكول نضيف وشيك وامور كدا ونبدا نكتب اول سطر فى تخطيطك لحياتك

اعمل ليك جدول وخانه لكل جزء من الى فاتو مع مواعيد كمان يعنى مثلا انا فى الجزء الروحانى مش تمام طب انا مثلا هحسن علاقتى بربنا هصوم او هصلى او هحفظ ايه من القران انهرده هبدا انا من انهرده وحدد ليك واجب فى الجزء ده واكتب بعد فترى كبيرة يعنى الفوائد الى هتعود عليك من انجازك للحاجات الى انت حددتها يعنى مثلا بعد شهر هكون حفظت سورة من القران وعلاقتى بربنا بدات تتحسن اوى وهدى نفسى 7 من عشرة بدل ما كانت اربعه من عشرة الجزء ده مهم جدا جدا لانك لما تكسل فى انجازك لاهدافك فى الجزء كدا هتلاقى قدامك الحافز انك تكمل.

نوصل لجزء الخير انا مش بعمل اى نشاط ولا متطوع ولا اى حاجه هخصص من وقت كل اسبوع يوم او ساعة وهكذاا وهوصل لنتيجه انى هرضى نفسى وهساعد غيرى وهساعد مجتمعى بالنهوض وهكذاا فى باقى الاجزاء طبعا لو فى جزء معين انا مذكرتوش انت ممكن تضيفه وتكتب اهدافك  فيه والنتيجة الى هتوصلها وصلت النقظة بتاعتى ولا لا؟

طب عمر حد سالك عرفنى عن نفسك انت مين وعايز ايه ؟؟؟

اكيد حد سالك واكيد كتير تنحوا فى السؤال ومعرفوش يجاوبوا طب سهله برده هنمسك الورقه او الكشكول زى ما تحب وارسم اى حاجه ارسم قلب ارسم شجرة ارسم لمبه اى شعار ليك مش مهم تكون بتعرف ترسم المهم انك ترسم اى حاجه وحشه حتى مش مهم وقسمها6 اجزاء

هنكتب فى اول جزء اهم صفاتك الايجابية المميزات بتاعتك ومتفشرش بليز عشان دى ليك انت والصراحه مطلوبة

الجزء التانى اهتماماتك وهوايتك

الجزء الثالث رسالتك واولوياتك فى الحياة

الجزء الرابع اهم اهدافك فى الحياة

الجزء الخامس مبادئك وقيمك

ماشى انزل باه تحت الشعار واكتب باستفاضه فى كل جزء من السابقين واشرحه يعنى انا صفاتى الكويسه كذا وكذا واهتماماتى كذا وهكذاا لحد ما توصل للاخر وبكدا تعرف نفسك اكتر من خلال قلمك وورقتك وكشكولك ولما يجى حد يقولك عرفنى بنفسك متقولش انا معنديش اخوات ووحيد ماما وبابا هه هه اتفقنا

اللهم انـى صـائـمـة

بركاتك يا شهر الصوم شهر الخير واليمن والبركات شهر كريم

بستغرب من حالى واحوالى وافعالى فى شهر رمضان قد اكون مثلى مثل غيرى من الفتيات وقد لا

فى هذا الشهر الكريم اواظب على صلاة القيام وعلى قراة القران وعلى ختمه اكثر من مرة ارتدى العباءة وانا ذاهبه للصلاة لا ميك اب ولا برفان ولا اكسسوارات اتجرد من كل الاضافات والالوان وتلك الاشياء التى تعطى للملابس شكلا مختلف لا اشاهد التليفزيون فى نهار رمضان واواظب على الاستغفار والاذكار ..

نصلى المغرب فى جماعة ثم الفطار ثم الذهاب للصلاة وعند الرجوع قد اشاهد مسلسل او لا على حسب لا اشاهد الاغانى والكليبات ولا استمع اليها لا ع الموبايل حتى حياتى ويومى بسيط جدا وغير معقد فى رمضان احاول ان اكسب الحسنات واقلل من السيئات واتجنب ما قد يزيدها ما اروع واجما تلك الحالة

فى اول ايام العيد اذهب للصلاة بالعباءة ولا ميك اب ايضا كما الحال فى ايام رمضان لكن بمجرد دخول الليل وتاهبى للخروج يتبدل حالى واحوالى يعنى البس جينز احط ميك اب (مع العلم انى مبحبوش يعنى ومش بحطه كتير ) واعيش حياتى عادى باه جايز اكون زى زى بنات كتير فى اللبس والطرحه سبانيش وارجع تانى اغير نغمة الموبايل واسمع الاغانى واشوف مين نزل البومات فى العيد والافلام ووو واتابع المسلسلات الى فاتتنى

واعيش حياتى عادى جدا انا بطبعى والعادى بتاعى مواظبه على الصلاة والحمدلله وقراة القران فى غير رمضان والحمدلله طب فين سلوك الملائكة بتاع رمضان بخ طار فين اللبس الواسع والعباءات بخ طاار بدلناه بالجينز والطرحه السبانيش والبرفيوم والاكسسوار حالى حال بنات كتير طب احنا كدا صح ولا غلط احنا كدا عندنا انفصام شخصية ولا ايه يعنى احنا بنات مؤدبة وماشين فى المعقول بس فى رمضان حالتى افضل واحسن ليه مكملش باه لبعد رمضان مشعارفه بس بحاول اكون افضل ويارب اكون افضل