اللهم انـى صـائـمـة

بركاتك يا شهر الصوم شهر الخير واليمن والبركات شهر كريم

بستغرب من حالى واحوالى وافعالى فى شهر رمضان قد اكون مثلى مثل غيرى من الفتيات وقد لا

فى هذا الشهر الكريم اواظب على صلاة القيام وعلى قراة القران وعلى ختمه اكثر من مرة ارتدى العباءة وانا ذاهبه للصلاة لا ميك اب ولا برفان ولا اكسسوارات اتجرد من كل الاضافات والالوان وتلك الاشياء التى تعطى للملابس شكلا مختلف لا اشاهد التليفزيون فى نهار رمضان واواظب على الاستغفار والاذكار ..

نصلى المغرب فى جماعة ثم الفطار ثم الذهاب للصلاة وعند الرجوع قد اشاهد مسلسل او لا على حسب لا اشاهد الاغانى والكليبات ولا استمع اليها لا ع الموبايل حتى حياتى ويومى بسيط جدا وغير معقد فى رمضان احاول ان اكسب الحسنات واقلل من السيئات واتجنب ما قد يزيدها ما اروع واجما تلك الحالة

فى اول ايام العيد اذهب للصلاة بالعباءة ولا ميك اب ايضا كما الحال فى ايام رمضان لكن بمجرد دخول الليل وتاهبى للخروج يتبدل حالى واحوالى يعنى البس جينز احط ميك اب (مع العلم انى مبحبوش يعنى ومش بحطه كتير ) واعيش حياتى عادى باه جايز اكون زى زى بنات كتير فى اللبس والطرحه سبانيش وارجع تانى اغير نغمة الموبايل واسمع الاغانى واشوف مين نزل البومات فى العيد والافلام ووو واتابع المسلسلات الى فاتتنى

واعيش حياتى عادى جدا انا بطبعى والعادى بتاعى مواظبه على الصلاة والحمدلله وقراة القران فى غير رمضان والحمدلله طب فين سلوك الملائكة بتاع رمضان بخ طار فين اللبس الواسع والعباءات بخ طاار بدلناه بالجينز والطرحه السبانيش والبرفيوم والاكسسوار حالى حال بنات كتير طب احنا كدا صح ولا غلط احنا كدا عندنا انفصام شخصية ولا ايه يعنى احنا بنات مؤدبة وماشين فى المعقول بس فى رمضان حالتى افضل واحسن ليه مكملش باه لبعد رمضان مشعارفه بس بحاول اكون افضل ويارب اكون افضل

مـواطـنـة كـنـبـاويـة فـى أيـام الـثـورة الـمـصـريـة

23 يناير 2011

تجمع عائلى

الخالة : سمسم ها يا حبيبتى كلها يومين وعيد ميلادك زى كل سنة ولا ايه النظام

أسماء:خالتو لا حتمال كبير انزل القاهرة اليوم ده اغير جو

محمد: ايه لا لا لا اوعى تنزلى يا بنتى ده هيبقى يوم قلبان ومظاهرات ووجع دماغ

أسماء:مظاهرات ايه

محمد:يوم الكرامة يا بنتى انا عارف ايه ده هيه الحكاية ناقصة

أسماء:يعنى مظاهرات يوم عيد ميلادى مش مهم انا مش هنزل وسط البلد

الخالة: لا يا اسماء ده الموضوع ده منتشر عالنت ومظاهرات فى كل حته فى مصر

أسماء:مظاهرات ايه هتبقى زى كل مرة على السلم وخلاص

محمد:انا قلتلك وانتى حرة

الخالة:بلاش يا اسماء احسن

ماما:خلاص سيبيها لله يا سوسو سافرنا ربنا ييسرها ما سفرناش هعملك احلى الحلويات

24يناير2011

أسماء:ماما جبتى كل حاجة خلاص هتعمليه برده

ماما:اه هعمله ده يوم الهنا عقبال ما اعملك فى فرحك

أسماء:ربنا يخليكى ليا يا ماما

25يناير2011

صحيت من النوم مبسوطة يوم عيد ميلادى باه محدش قدى صبحت ع ماما حبيبتى كانت فى المطبخ بتعمل الحلويات والتليفون مبطلش رن تهانى باه وعلى ميعادنا بليل يا سوسو

دخلت عالفيس بوك اشوف الناس الى بعتالى كله كاتب كل سنة وانتى طيبة حد يبقى عيد ميلاده مظاهرات

واحده صحبتى تانية كاتبه لازم ننزل دول ضربونا خدو معاكو بيبسى وربنا معانا مدينة نصر مليانة ووسط البلد المرة دى غير كل مرة

انا طبعا ايه الكلام الفاضى ده مفكرتش حتى اعكنن على نفسى يوم عيد ملادى قفلته وظبطت نفسى عشان قرايبى واصحابى بليل هيجولى يقضو معايا عيد ميلادى

اها وتمام الحمدلله ماما حبيبتى عملت حلويات طبعا كتير وكانت زى الفل (ماما دى اصلها متمكنة)

26و27يناير 2011

الأحداث تقريبا واحده فى كل برامج التوك شو شباب كتير نازل فى مظاهرات سلمية يطالبو (حرية كرامة عدالة اجتماعية)

حديث عائلى

ماما:ايوه كدا احنا تعبانين البلد باظت خلوهم يحسو بينا شوية

أسماء:اه فعلا يا ماما مكنتش متوقعه ان العدد كبير كدا ياريت الواحد كان ساكن فى القاهرة كان نزل

بابا:يارب يسمعو ويفهمو ان الشعب تعبان والرسالة تكون وصلت

28يناير2011 صباحا

فتحت التليفزيون من الصبح مفيش اى حاجه وانا بدعى فى سرى واقول استرها يارب انهرده الجمعه واكيد بعد الصلاة الدنيا هتكون مقلوبة بعد الصلاة فعلا فوجئت بالعدد المهول فى التليفزيون كنت فاتحة على قناة الجزيرة لان القنوات المصرية كلها فضائية وارضيه ولا كأن فى اى حاجه ولا كأن البلد مقلوبة مفيش التليفون رن خالتو بتطمن وقالت النت مقطوعة وشبكات المحمول بتقطع وممكن متجمعش خالص انا قلت لا لا الموضوع كبير فعلا

وهيه بتتكلم سمعت صوت مظاهرة عندنا قفلت معاها بسرعه وروحت اشوف بحكم سكنى فى بلدتى فى منطقة حيوية فالمظاهرة جت عندنا ووقفت ياااااااااااااه كل دى ناس طلعت يااااااااااه منظر تقشعر له الابدان وكانو بيطالبو بشئ واحد فاق تصورى ان خلاص باه بيقولو كدا عادى ومش خايفين

(الــشـــعــب يـــريـــــد إســـقـــاط الــنــــظــــــام ) ما هو الا هتاف تردد كثيرا بعد يوم الجمعة او كما سمى بجمعة الغضب

انتقلت الى الشاشة الصغيرة مرة اخرى وانا اتمنى لو استطعت النزول رفضت والدتى وكذا رفض والدى كل هذه البشر تطالب باسقاط النظام وعربات الشرطه تدهسهم وترش عليهم الماء وهم يؤدون الصلاة وفوق الكوبرى لا ملاذ لهم ولا فرار

مشهد اخر فوق الكوبرى ناس بتحدف بعض بطوب وناس بتضرب بعض عرف بعد ذلك انهم كانو افراد الشرطة بلبس مدنى

مشهد من شيوخ واطفال ونساء وشباب كلها خرجت بعلو الصوت وتهتف باسقاط النظام صورة محفورة فى ذاكرتى معقول هذه الجموع خرجت اخيرا خرج المارد ولا عودة له مجددا

هذا الشعب المكبوت من ثلاثين عاما خرج اخيرا هذا الشعب هوه انا وانت وخالتى وعمى وجدى واختى وصديقتى كل منا عانا كثيرا فى هذه السنوات السابقة من الظلم والفساد والرشوة والواسطة والمحسوبية هذا الشعب الذى ظل صامتا لفترات طويلة عله يحدث تغيرا فى البلاد

الى متى حال البلاد بهذا السوء

الى متى وكل اسرة لها ابن او قريب متغرب فى بلاد اخرى لقله فرص العمل فى بلده ويعامل معاملة سيئة حيث انه اما انا او لا بلدك طردك فتقبل هذه المعاملة يا مصرى

الى متى ولا وجود لفرص العمل الا لمن لديه واسطه

الى متى هذه الحالة السيئة التى اصبحت فيها البلاد حى القمامة محتاجه خبرا اجانب عشان يحلوها ؟

كل اهتمامنا باه المنتخب هيلعب امتى ؟ حى الاطفال لما تساله تحب تطلع ايه يقولك لعيب كورة مهو لعيب الكورة دلوقتى هوه ده الى بيجيب فلوس

الى متى حال التعليم البايظ بنطلع ولا فاكرين اى حاجه عودونا اننا نحفظ مش نفهم

الى متى لما طالب فى الثانوية العامة يجيب 104% امعقول هذا ؟

الى متى وكل علماؤنا فى بلا العالم يهبو علمهم لهم ونحن بلدهم لا نستفيد بهم

الى متى اشعر بكرامتى مهانة فى بلدى انا

هذه بلاد لم تعد كبلادى فعلا كما قالها الشاعر الكبير فاروق جويدة

ااااه يا بلدى حان الوقت ان الاوان ان الشعب يخرج يقول لا كفاية ظلم كفايه فساد كفاية كفايه

28يناير 2011 مساء

تابعت بكل جوارحى ما يحدث فى القاهرة والسويس من خلال تلك الشاشه الصغيرة عبر قناة الجزيرة والعربية وانا فى حالة ذهول ما حدث ليلا من اسحاب قوات الشرطة من الشوارع وامر رئيس الجمهوريه بصفته القائد الاعلى للقوات المسلحه بنزول قوات الجيش ودخول البلد فى حظر تجول قد يكون هذا المشهد لابى وامى شبه معتاد فهم عاشو حروبا ووقت الاستعمار وشعرو بهذا الجو الملغم من قبل ولكنى ذهلت هل هذا يحدث فى بلادى ولم حدث ومشاهد حرائق فى اماكن عده من مراكز للشرطه او مولات تجاريه او محال ومشاهد لمواطنين يحاولون احراق عربات الشرطه ومشاهد اخرى لمواطنين يسرقون من تلك المحال التى حرقت واعمال تخريب وسلب ونهب وقلق اجتاح كل بيت فى مصر المحروسة

فى الايام التاليه

تتشابه الاحداث ولا حديث ولا نقاش سوى الى متى ؟ والى اين ؟ بين الجيران وبين الاقارب وبين الباعه وبلا تهويل كل بيت فى ارجاء مصر المحروسه كان يتابع كل القنوات الاخبارية ولا غيرها فهذه هى بلدنا ونريد ان نعرف ما سوف يحدث فى نطاق عائلتى واقاربى الاغلب كان موافق لحدوث الثورة ومعاها جدا بس كفايه صوتنا وصل نروح باه والناس الى فى التحرير كفايه كدا البلد هتخرب هما عايزين ايه ؟ حرام عليهم

هذه الفئه من الشعب الى اعتقد انها كثيرة جدا هيه دى الفئه التى سميت بالاغلبيه الصامته وحزب الكنبه ليه لانه متحركش ولا شارك فى الثورة ولا حتى طلع قال رايه فى اى حاجه وبيطلع على مداخلات تليفونيه يقول يروحو باه احنا تعبنا .

صح انا كنت منهم وقاعده فى البيت وبتفرج بس انا كنت عاوزة انزل اروح التحرير مكان تجمع كل الشعب الغاضب والاقى مصيرى اى كان رب هنا رب هناك والى هيجرالى هيجرالى ونصيبى مش هغيره والاعمار بيد الله لو مت على ايد بلطجى فى الطريق ولا ادهست تحت عربيه زى الى ماتو هما مش احسن منى لا لكن الرفض من اهلى ده كان الرد ملناش دعوة يا بنتى وده حال بنات كتير ويمكن ولاد كتير كمان مش من سكان القاهرة الى كانت كل الاحداث فيها تقريبا يعنى لو ساكن فى اى محافظه تانيه مكنتش هتلاقى روح الثورة الحماسيه دى بصراحه فى بعض اقاربى اطباء راحو التحرير لمسانده المرضى وايضا للمشاركه فى هذا الحدث الكبير

كم انبت نفسى وبكيت لانى لا استطيع الذهاب ومشاركة اهالى بلدى فى صنع التاريخ وتغير الحاضر ودفن الماضى كم لعنت عدم سكنى فى تلك المحافظة العاصمه القاهرة لكى اكون فى مكان الحدث وحتى لا يقال يا بنتى اقعدى فى البيت انتى لسه هتسافرى ومش عارفين ظروف الطريق ايه واتصالات من اخوتى كل يوم ليطمانو علينا ومتروحيش فى حته خليكى فى البيت طيب طيب حاضر مش راحه بس كنت حزينة اوووى

11فبراير2011 مساء

ماما:ها يا بنتى هيطلع امتى يتنحى باه احنا تعبنا عاوزين البلد ترجع تانى وحالها ينصلح

اسماء:يا ماما خلاص اهو كل مرة بيقول هيطلع يقول خطاب ويطلع بعدها بكام ساعه

ماما:على رايك يا بنتى كل مرة يلطعنا جنب التليفزيون نستناه بالساعات

عمر سليمان : قرر الرئيس محمد حسنى مبارك تخليه عن منصبه ويسلم المجلس الاعلى للقوات المسلحه ادارة شئون البلاد

ماما :خلاص الحمدلله الحمدلله يارب حال البلد ينصلح باه احنا تعبنا يا بنتى مهندسه وقاعده جنبى مفيش شغل واخواتك متغربين عشان حال البلد وشباب العيله واحد ورا التانى بيسافر من البلد والشغل الى بواسطه بس ومفيش عيشه نضيفه يارب اصلح حالنا يارب

اسماء يااااااااااااااااااااااااااااااااااااااااااااه اخيرا ده انا مش مصدقه يا ماما

بابا:الحمدلله يا بنتى نشوف حالنا باه وحال البلد ينصلح

طبعا كل المكالمات الهاتفيه عن خبر التنحى منها الى معاه ومنها الى ضده وان البلد كدا هتبوظ بس احنا لا لا مفيش بوظان تفاءلو البلد هتنصلح ان شاءالله

13 فبراير صباحا

ماما:عاوزة تروحى التحرير بيقولو فى احتفاليه يوم الجمعه والشيخ يوسف القرضاوى هيقول الخطبة

اسماء:ايه يعنى هنروح؟

ماما:اه لو عاوزة اروح انا معاكى ونتكل على الله

اسماء:بجد يا ماما هيه هيه هيه هيه هيه هيه هنروح التحرير

طبعا بعد علم ناس قرايبنا بالقصه ده لا لا تروحو فين ده البلد فيها قلق خليكو وناس تقول يا سلام ياريت نيجى معاكو وهكذاا

18يناير2011 صباحا باكرا

اسماء:ماما يلا باه اصحى انتى غيرتى رايك

ماما:لالا حاضر روحى يلا حضرى الفطار

ماما:خلاص حضرتى كل حاجه

اسماء:ايوا يا ماما جبت العلم والكاميرا وكله تمام

يلا توكلنا على الله استرها معانا وسهلها يااااارب

11صباحا فى عربه المترو

منظر جميل ناس كتير ماسكين اعلام اطفال ونساء وبنات وفتيات وكله متحمس يااه ياريتنى كنت جيت فى عز الثورة بس الحمدلله كله خير

طلعنا من المترو بنت قابلتنا قالت معلش ممكن البطاقه والشنطه تفتحيها فتحتها بكل سرور واديتها البطاقه مفيهاش حاجه مهى بتأمن الميدان مصلحه ليا وليها

ياااه مشينا مسافه قصيرة بعدها لاقيت الناس واقفه مفيش مكان يااه معقوله كل دى ناس دول صحيو امتى ووصلو هنا امتى كان جنبى عائلات كتير اول مرة ينزلو برده سمعت الشيخ القرضااوى وبيلقى الخطبه كل العدد المهول ده كان ساكت وبيسمع وبيستمتع باللحظة الرائعة وذلك المشهد المهيب شويه شباب عملو زى دائرة حوالينا (النساء) عشان محدش يخبط فينا ونعرف نصلى يااه روح جميله اووى صلينا واحنا واقفين طبعا لان مفيش مكان للسجود صلاة الغائب وصلاة الجمعة وصلاة العصر لاننا كنا مسافرين واول ما خلصت الصلاة بدأت الهتاف

الشعب يريد تطهير البلاد و ارفع راسك فوق انت مصرى وبلادى بلادى لك حبى وفؤادى وكتير وفضلنا نلف فى الميدان وكل مجموعة بتلقى هتاف ومجموعه تانيه تهتف عاش الهلال مع الصليب ومجموعة تانيه تطالب بالمحاكمة والقصاص ومجموعة الباعه الجائلين دول بالذات عاشو حياتهم من بيع صور الشهدا والاعلام وشاى ومية وقهوة وعرق سوس ههه الشعب المصرى مبيفوتوش حاجه ووصلنا عند الكوبرى دبابات والناس واقفه تسلم عالعساكر وتتصور معاهم مشهد تحه كوميدى جدااا بيبين طيبة الشعب المصرى الجميل ومشهد تانيه مسيرة رافعه علم مصر كبييييييييير اوووووووووووى وطويييييل اووووى يااه روح بجد جميلة

تركنا الميدان 3 عصرا باكرا جدا لاننا خفنا من الطريق ومشاكله ورجوعنا تانى لمحطه المترو كم رهيب من البشر طالع الميدان ياه ناس تروح وناس تيجى الميدان مش هيفضى

الحمدلله وصلنا المنزل بسلام وكملت احتفال باه معاهم وانا بتابع الشاشة الصغيرة بس المرة دى التليفزيون المصرى ورجعت تانيه للكرسى المعتاد وللكنبة بتاعتى ورجعت تانية للمواطنة الكنباوية

يتبع..

حــلوى حـلـوة (عمايل ايديا ) انا

سمبوسك بالمكسرات

نيجيريا

الكنافة

بلح الشام

كحك العيد

بسكوت الانكشير وبسكوت القرفة

البيتى فور

حلوى العيد



كلمة وذكرى

التدوينة هذه قد تراها عجيبة وغريبه ولا قيمة لها ولكنها تواردت الى ذهنى قررت ان اكتبها وان كنت مثلى فشاركنى بما يتوارد الى ذهنك عندما تسمع هذه الكلمات او غيرها حيث كل كلمة لها ذكرى ما لدينا وبالتالى عندما نسمعها تتوارد الى ذهننا هذه الذكرى  

كلب : الكلب الى عض بنت خالى واحنا صغيرين وخدت 21 حقنة يعنى كل ماشاوف كلب احس انه هيجرى ورايا

قطة: القطة الى خربشت بنت فى مدرسة الثانوى اثناء تحية العلم كرهتنى فى التحيه بقيت ابص طول الوقت ع رجلى

رمضان:صلاة القيام امام المسجد اصله بيصلى بجزء كامل

6اكتوبر:ايام المدرسة وكل سنة لازم نرسم موضوع عن 6 اكتوبر وانا رسمى اصله بعافيه شوية

شم النسيم: يوم هايل بحبه اوى وبستناه من السنة للسنة لاننا بنقضيه فى الهواء الطلق

العجلة: لما ركبت ورا اخويا ورجلى اتعورت من العجله الى ورا السلوك الى فيه فتحتلى رجلى كرهتنى فى العجل لحد دلقتى بخاف منه ومبعرفش اركب

جرايد : ايام المصيف فى راس البر وكل يوم الصبح بتاع الجرايد يقول جرايد جرايد

المايك: ايام المدرسة برده لما كنت بطلع فى الاذاعة المدرسية

الهدهد:قصه سيدنا سليمان والهدهد فى سورة النمل من القران الكريم لانى كنت بمثل دوره فى مسرحية المدرسة

الكمان:ايام ثانوى كنت عاوزة اختار موسيقى كنت بشوف صحابى بيعزفو عليه بس قالو الموسيقى صعبه خدى رسم احسن ويارتنى ما سمعت كلامهم

الاتوبيس: اتوبيس 6ج كان احمر كدا اتوبيس عتيق اول سنة ليا فى الجامعه كنت بركبه كنت بخاف اركب المواصلات التانية

الشبورة: يوم الشبورة فيه كنت جامده جدا كنت مسافرة الساعه 6 والسواق طلع بينا وانا فعلا مش شايفه قدامى وكان ماشى بسرعه واهو ربنا سترها

الدش (الى بيجيب القنوات الفضائيه مش الدش بتاع الحمام ): التفافنا حولين الراجل وهوه بيركبه كان حدث ايامها

نجمة:كنت باخد نجوم كتير فى امتحانات المدرسة وممتازة

الدكتور:دكتور السنان مفيش غيره بكرهه اصلى بروحله كتير اوى

أرنب:ملوخية بالارانب طعمه اوى اصلها واعتقد كلنا لما بنسمع كلمة ارنب بيروح مخنا للملوخية

الاسد: حديقة الحيوان طبعا محنا منشوفوش الا هناك

النحلة:قرصتها علطول مهى بتلسع اوى

يعنى ايه كلمة (وطن) ؟؟

فكرت فى معنى كلمة وطن وانتماءك لوطنك خصوصا فى الفترة الاخيرة والظروف الحاليه التى تمر بها مصر ما بعد الثورة طب يعنى ايه وطن وهل انا عندى انتماء لوطنى وبحبه ولا لا ؟ انا معنديش اجابة بس هقول الافكار الى تواردت الى ذهنى لما فكرت فى يعنى ايه كلمة وطن

بداية فى برنامج على قناة المصرية بيستضيف المصرين المقيمين بالخارج وفى الاغلب المقيمين فى بلاد اوروبا والدول المتقدمة

يجى ضيف ويقول مصر بحبها اوى الى يشرب من مية النيل لازم يرجعلها تانى ويسال المذيع اخر مرة كنت فى مصر امتى يقول 18 سنة !!! نعم 18 سنة وبتقول بحبها طب ازاى فى حد يحب حد يسيبه 18 سنة ؟

يجى ضيف تانى يقول مصر ده بلدى وام الدنيا واحسن بلد فى العالم واطيب شعب يسال المذيع برده طب اخر مرة نزلت امتى يقول منزلتش من 20 سنة !!!!!! نعم 20 سنة واحسن بلد فى العالم لما هيه كدا سبتها كل ده ليه؟

اكيد انى استفزيت من البرنامج ده وبطلت اتفرج عليه انا وجهة نظرى ان بلدك يبقى تعيش فيها بتحبها يبقى تقيم فيها وتحبها عن قرب مش من بعيد لبعيد طب الناس المقيمة فى الخارج ده بتحب مصر فعلا وهل هيه وطنية فعلا انا شايفه انها لا مصر زيها عنده زى اى بلد تانية ولو مصر بتولع هوه مالوش دعوة مهو مش حاسس بيها ولا مقيم فيها هوه عايش بعيد مرتاح ومقضيها اراء فى الشاشات .

طب نيجى باه للمقيمين فى دول الخليج وانا شخصيا اعرف ناس كتير منهم يعنى مبينزلوش الا كل كام سنة وللشديد الاوى كمان يعنى حد مات او فرح حد او وحشوه اوى اهله ونازل يشوفهم (مع اعتراضى على الاخيرة ده لانه مع الوقت بيتعود ع الغربة وانه ميشوفش اهله ومع الوقت بيصبح جاف شويه ) اكيد مش كلهم بس فيه منهم كدا .

طب نبص باه لما ينزلو مصر  يعترضو على كل حاجه ويستغربو احنا عايشين كدا ازاى البلد مش نظيفة وزحمة ومش عاجبهم اى حاجه لانهم بيقارنوها بالبلد المقيمين فيها ؟ طب دول بيحبو مصر وعندهم انتماء ولا لا ؟

الى عايشين فى مصر باه هما كمان مش عاجبهم حال البلد وقرفانين وتعبانين وفى رايى بحس ان مصر بتعاقبنا عشان اتولدنا مصرين واكيد للاسباب دى وغيرها الناس عملت ثورة لانهم بيحبو بلدهم وعايزنها تبقى افضل واحلى .

فى نسبة تانية اغلبها من الشباب العاطل الى حاله يصعب على اى حد لما يكون خريج كليه ومتعلم ومعاه كورسات وشهادات ومش لاقى شغل ده بيتمنى فرصه بس للعمل فى اى بلد ويثبت نفسه وبيكون عاوز يخرج منها مهو بالعقل والمنطق هيقعد فى بلده يعمل ايه يهش ذباب مثلا ولا ايه لازم يدور على عمل ويلاقى نفسه ويبدا يشق طريقه فى الحياة ومتقوليش بيروحو بره يغسلو اطباق لا دى نسبة بسيطة منهم الى بيعمل كدا والباقى بيلاقى فرص عمل كويسه ومناسبة ليهم طب ده عايش فى البلد وبيدور يخرج بره ده عنده انتماء ولا لا ؟

انا امبارح كنت راكبة تاكسى وفضل يلف بيا فى بلدى شويه المشوار كان بعيد حبه عديت على الشارع الى كنت باخد فيه دروس فى ابتدائى وعلى مدرسة ابتدائى واعدادى وعلى المكان الى اتعورت فيه ووقعت وعلى النادى الى كنا بنتجمع فيه انا وصحابى وكانت ابتسامة على وجهى لانى برجع تانى لذكرياتى وحسيت انى دى منطقتى ودى بلدى برغم انها وحشه بس بحبها عشان فيها كل ذكرياتى الحلوة والوحشة طب هل ده معنى كلمة وطن ؟

انا بجد مش عارفه يعنى ايه كلمة وطن وسيظل السؤال الابدى يعنى ايه كلمة ( وطن )؟

فارس احلامى

ياااه أقول إيه ولا إيه عن فارس الاحلام مانا لو حكيت واتكلمت هتلاقو كلامى كل البنات

فارس الاحلام فتى احلام كل البنات فارس على حصان ابيض هيخطف البنت وياخدها مكان جميل ويعيشها عيشه حلوة  يعنى الشاب الروش الرزين الامور الحنين العطوف الكريم الاجتماعى المتكلم الشيك المؤدب الجرئ الرشيق الى كل بنت بتتمنى تقابله ويكون من نصيبها ...

بنشوفه فى ابطال الافلام او المغنين يعنى بيطلع الفنان من دول باحلى مظهر ويمثلنا قصه حب مع احلاها بنت ويقولها احلى كلام وتيجى باه البنت تقول انا عاوزة من ده انا عاوزة زى ده .

مؤخرا باه بعد انتشار المسلسلات التركى وابطاله المعروفين بالاسم المدبلج (مهند,امير,ايزيل,يحيى,عامر,جهاد,عمار,عمر,سمير) وان كان اكثرهم شهرة فى العالم العربى مهند ومسلسل نور الشهير صحيح مهو وسيم وبيعامل حبيبته فى المسلسل احلاها معامله خصوصا انه زوجته يعنى مش زى عندنا فى مصر اول ما يتجوزها يقلبها ويصدرلها الوش الخشب وغنى وناجح فى شغله يبقى بذمتكو البنات متحبوش ليه وتتمنى واحد زيه ليه بس صراحه انا بحب امير وجهاد يعنى لو جالى حد زيهم هوافق فورا

طيب يعنى حبه صراحه مع النفس كدا فارس الاحلام ده مش موجود ماشى مش موجود خالص وكل الى بنشوفه ده كلام افلام ومسلسلات واغانى واحنا بنصدق بس احنا لازم نتفرج وبس وبعد ما المسلسل يخلص نقفل على كدا لاننا هنتعب يا بنات الفارس ده مش موجود فعلا مش هتلاقى شاب فيه كل الصفات الحلوة دى ببساطة لان مفيش حد كامل ولازم لكل انساس عيوب ومميزات وحاجة تشيل حاجه متعقدوهاش باه ورتبو اولوياتكو فى اختياركو للفارس الحقيقى .

فارس الاحلام ممكن يبقى فعلا فارس حقيقى فيه عقل امير ووسامة مهند وقلب جهاد وكمان ممكن يكون فيه غلاسة ورخامة وعصبية وغرور يعنى على حسب باه كل بنت تتحمل ايه ومتتحملش ايه

بس ده ميمنعش انى مازلت بحلم ببطل تركى يا مسهل

رمـضــان جـانـا

(شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدىً لِلنَّاسِ وَبَيِّنَاتٍ مِنَ الْهُدَى وَالْفُرْقَانِ فَمَنْ
شَهِدَ مِنْكُمُ الشَّهْرَ فَلْيَصُمْهُ وَمَنْ كَانَ مَرِيضاً أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ يُرِيدُ اللَّهُ بِكُمُ الْيُسْرَ وَلا يُرِيدُ بِكُمُ الْعُسْرَ وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ) (البقرة:185)

بشـايـر رمضـان :

هلت بشاير رمضان مثل كل عام فى احياء والشوارع والميادين والمحلات التجارية فى كل أرجاء مصر المحروسة متمثلة فى تلك الشوارع الضيقة مزينة بزينة رمضان الشهيرة بدات قديما ومازالت منتشرة لوقتنا هذا فى هذا الشهر الكريم فهى مثل الاحتفال بقدوم هذا الشهر وتكون عبارة عن قصايص ورق مدلاة من خيط رفيع تعددت ألوانها وأشكالها من ورقة مربعة او مستطيله او مثلثة إماإنها أخذت من ورق جرايد او ورق أبيض عادى او ورق جلاد ملون شفاف مكتوب عليه اهلا رمضان وتكون تلك الزينة فى بعض أحياء المدينة مثالا لترابط أهالى المنطقة ببعضهم حيث انها تمتد من البلكونات المقابلة لبعضها والاسطح ويتدلى فى أوسطها فانوس مضاء كان قديما لينير طريق المصلين أثناء ذهابهم لأداء صلاة الفجر . ما اجمل هذا المنظر عندما تكون عابرا فى الطريق يبعث عليك البهجة والسرور ..

أما المحال التجارية فتتزين رفوفها ببضاعة رمضان الشهيرة بالياميش وتجهيز ماكينات عمل الكنافة والقطايف الحلوى الرمضانية .

تتوضح الرؤية فى اواخر شهر شعبان بعد صلاة العشاء ويظهر المفتى ويثبت لنا ان كان غدا هو المتمم لشعبان او هوه غرة رمضاان (وان اصبح حديثا معروفا مسبقا باستخدام علوم الفلك ولكن لا محال الا ان يروا الهلال )

ان كان غرة رمضان نبدا فى التاهب للذهاب لصلاة التراويح

 خـصـائـص رمـضـان :

ومن خصائص شهر رمضان: تفتح فيه أبواب الجنة، وتغلق أبواب النار، وتصفد مردة الشياطين وعصاتهم، فلا يصلون ولا يخلصون إلى ما كانوا يخلصون إليه من قبل، قال : { إذا دخل رمضان فتحت أبواب السماء، وغلقت أبواب جهنم، وسلسلت الشياطين }، وفي رواية: { إذا جاء رمضان فتحت أبواب الجنة } [البخاري].

- ومن خصائص شهر رمضان: تضاعف فيه الحسنات.

- ومن خصائص شهر رمضان: أن من فطر فيه صائماً فله مثل أجر الصائم من غير أن ينقص من أجر الصائم شيئاً، قال : { من فطر صائماً فله مثل أجره من غير أن ينقص من أجر الصائم شيء } [حسن صحيح رواه الترمذي وغيره].

- ومن خصائص شهر رمضان: أن فيه ليلة القدر التي هي خير من ألف شهر، وهي الليلة المباركة التي يكتب الله تعالى فيها ما سيكون خلال السنة، فمن حرم أجرها فقد حرم خيراً كثير، قال : { فيه ليلة خير من ألف شهر، من حرم خيرها فقد حرم } [أحمد والنسائي وهو صحيح]. ومن قامها إيمانا واحتسابا غفر الله له ما تقدم من ذنبه، قال : { من قام ليلة القدر إيماناً واحتساباً غفر له ما تقدم من ذنبه } [متفق عليه]، وقال : { من قامها إبتغاءها، ثم وقعت له، غفر له ما تقدم من ذنبه وما تأخر } [أحمد]. فياله من عمل قليل وأجره كثير وعظيم عند من بيده خزائن السموات والأرض، فلله الحمد والمنة.

- ومن خصائص شهر رمضان: كثرة نزول الملائكة، قال تعالى: تَنَزَّلُ الْمَلَائِكَةُ وَالرُّوحُ فِيهَا [القدر:4].

- ومن خصائص شهر رمضان: فيه أكلة السحور التي هي ميزة صيامنا عن صيام الأمم السابقة، وفيها خير عظيم كما أخبر بذلك المصطفى حيث قال: { فصل ما بين صيامنا وصيام أهل الكتاب أكلة السحر } [مسلم]، وقال عليه الصلاة والسلام: { تسحروا فإن في السحور بركة } [متفق عليه].

- ومن خصائص شهر رمضان: وقعت فيه غزوة بدر الكبرى، وهي الغزوة التي تنزلت فيها الملائكة للقتال مع المؤمنين، فكان النصر المبين، حليف المؤمنين، واندحر بذلك المشركين، فلا إله إلا الله ذو القوة المتين.

- ومن خصائص شهر رمضان: كان فيه فتح مكة شرفها الله تعالى، وهو الفتح الذي منه إنبثق نور الإسلام شرقاً وغرباً، ونصر الله رسوله حيث دخل الناس في دين الله أفواجا، وقضى رسول الله على الوثنية والشرك الكائن في مكة المكرمة فأصبحت دار إسلام، وتمت بعده الفتوحات الإسلامية في كل مكان.

- ومن خصائص شهر رمضان: أن العمرة فيه تعدل حجة مع النبي ، ففي الصحيحين قال عليه الصلاة والسلام: { عمرة في رمضان تعدل حجة } أو قال { حجة معي }.

- ومن خصائص شهر رمضان: أنه سبب من أسباب تكفير الذنوب والخطايا، قال : { الصلوات الخمس، والجمعة إلى الجمعة، ورمضان الى رمضان مكفرات لما بينهن إذا اجتنبت الكبائر } [مسلم].

- ومن خصائص شهر رمضان: أن فيه صلاة التراويح، حيث يجتمع لها المسلمون رجالاً ونساءً في بيوت الله تعالى لأداء هذه الصلاة، ولا يجتمعون في غير شهر رمضان لأدائها.

- ومن خصائص شهر رمضان: أن الأعمال فيه تضاعف عن غيره، فلما سئل أي الصدقة أفضل قال: { صدقة في رمضان } [الترمذي والبيهقي].

- ومن خصائص شهر رمضان: أن الناس أجود ما يكونون في رمضان، وهذا واقع ملموس لنجده الآن، ففي الصحيحين عن بن عباس رضي الله عنهما قال: { كان النبي أجود الناس، وكان أجود ما يكون في رمضان.. }.

- ومن خصائص شهر رمضان: أنه ركن من أركان الاسلام، ولا يتم إسلام المرء إلا به، فمن جحد وجوبه فهو كافر، قال تعالى: يَا أَيُّهَا الَّذِينَ آمَنُواْ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ [البقرة:183]، وقال : { بني الإسلام على خمس شهادة أن لا إله إلا الله وأن محمدا رسول الله، وإقام الصلاة، وإيتاء الزكاة، وصوم رمضان، وحج البيت الحرام } [متفق عليه].

- ومن خصائص شهر رمضان: كثرة الخير وأهل الخير، واقبال الناس على المساجد جماعات وفرادى، مما لا نجده في غير هذا الشهر العظيم المبارك، وياله من أسف وحسرة وندامة أن نجد الإقبال الشديد على بيوت الله تعالى في رمضان أما في غير رمضان فإلى الله المشتكى. فبئس القوم الذين لا يعرفون الله إلا في رمضان

واجـبنـا فـى هـذا الشـهر :

 

1- أن ندرك أن الله أراد أن يمتحن إيماننا به سبحانه، ليعلم الصادق في الصيام من غير الصادق، فالله هو المطلع على ما تكنه الضمائر.

2- أن نصومه بنية فإنه لا أجر لمن صامه بلا نية.

3- أن لا نقطع يومنا الطويل في النوم.

4- أن نكثر فيه من قراءة القرآن الكريم.

5- أن نجدد التوبة مع الخالق سبحانه وتعالى.

6- أن لا نعمر لياليه بالسهر والسمر الذي لا فائدة منه.

7- أن نكثر فيه من الدعاء والإستغفار والتضرع إلى الله سبحانه.

8- أن نحافظ على الصلوات الخمس جماعة في بيوت الله تعالى.

9- أن تصوم وتمسك جميع الجوارح عما حرم الله عز وجل.

هذا- عباد الله- شهر رمضان الذي أنزل فيه القرآن، شهر القرب من الجنان والبعد عن النيران، فيا من ضيع عمره في غير الطاعة، يا من فرط في شهره، بل في دهره وأضاعه، يا من بضاعته التسويف والتفريط، وبئست البضاعة، يا من جعل خصمه القرآن وشهر رمضان، قل لي بربك كيف ترجو النجاة بمن جعلته خصمك وضدك، فرب صائم حظه من صيامه الجوع والعطش، ورب قائم حظه من قيامه السهر والتعب، فكل قيام لا ينهي عن الفحشاء والمنكر لا يزيد صاحبه إلا بعد، وكل صيام لا يصان عن الحرام لا يورث صاحبه إلا مقتاً ورداً.