04 April, 2011

انـت خـريـج فـنـون دمــاااغ يـعـنـى !!!!!!

دايما الانطباع عن خريجى كليات الفنون انهم جامدين اوى ودماغهم عالية اوى فنانين باه مرهفى الاحساس و.. و .... و ....

ههههه بصراحة ااه الكلام ده مظبوط انا خريجة واحدة من الكليات الجامدة دى فنون تطبيقية .

بس فى البداية مدخلتهاش حبا فيها يعنى ولا لانى فنانة ورسمى حلو منذ نعومة اظافرى لا خالص بس لانى ملحقتش الكليات الى بيقولو عليها كليات القمة فدخلت تطبيقية وبصراحه مش ندمانة ابدا الكلية حلوة جدا ودراستها ممتعة وكلية مميزة فعلا وارجوك متتخيلش اننا كنا عالم فاضية وكلية سهلة ومش محتاجة مذاكرة لا استنى احنا كنا بناخد فيزيا ورياضة وكمياء واكيد تاريخ الفنون وكان عندنا تقيمات بنطبق قبلها 3او 4 ايام عشان نروح مسلمين المشروع وتروح للدكتور وكمان ممكن ميعجبوش شغلك هههههه عادى يعنى مش كلية سهلة لكنها ممتعة .

الكلية دراستها خمس سنين 14 قسم بتدرس اعدادى عام بعد كدا بتتخصص فى دراسة القسم الى تنسيقك فى اعدادى هيقبله متستغربش هتخرج من تنسيق ثانوية عامه هتدخل فى تنسيق الكلية وبيختلف طبعا كل سنة على حسب اقبال الطلبة على الاقسام بس فى النهاية الاقسام كلها حلوة .

تخصصى كان طباعة المنسوجات والصباغة والتجهيز درست الطباعة على الاقمشة سواء باتيك عقد وربط استنسيل الطباعة بالشبلونات دى كانت متعبة جدا لانك بتعمل كله يدوى من التصميم لتلوينه لفصل الوانه لحد الطباعة على القماش واى غلطة ممكن تبوظ المشروع بالكامل .

درست صباغة الاقمشة برده وكنا نقف نتذنب فى المعمل بتاع ساعتين على ما القماشة تتصبغ والتجربة تنجح هههههه كان سيكشن عقاب .
سكشنى المفضل كان تصميم وهوه تصميم الاقمشة سواء كانت ملابس اطفال او نساء او مفروشات .

المواد العامة الى كله بيدرسها تاريخ فنون وعلم جمال وطبيعه صامته يعنى سكشن نرسم فيها كتير اوى بتكون قلل هههههههههه عادى عادى وطبيعة حية بنرسم فيه اشخاص وانا رسمى فى ده كان رائع كان سيريالى ومعرفش ازاى مكنتش بعرف ارسم اصلا

احلى مادة كانت فى اعدادى كانت رسم متاحف دى كنا بنروح نرسم من المتاحف يعنى المتحف المصرى المتحف القبطى المتحف الاسلامى وورينا باه شطارتك لما تقعد قدام تمثال لتوت عنخ امون ولا الجعران ولا مركب من مراكب الصيد ايام الفراعنه كنا بنقعد عالارض عادى كدا ونرسم والسياح باه رايح جاى يتفرج ههههههههههههههه بيشوف المواهب وتيجى باه تلون اللوحه وتطلع عنيك عشان تجيب نفس درجة اللون يااااااه كانت متعبة جدااا بس لذيذة اووووى
كمان كنا بنرسم ورق الشجر فى اى حديقة وانت وامكانياتك باه فى رسمه وتظليله بصراحه كان معانا مواهب حلوة اووى وناس ايديها فى الرسم حلوووة اووى وناس عادية زى كدا.

الكلية حلوة بجد ودراستها لذيذة جدا شوف كام واحد بيتخرج من هندسه او طب او صيدله او تجارة او حقوق وكام واحد بيتخرج من فنون احنا ناس كانت عدتنا القلم الرصاص الفرشاة الالوان البالتة الاسكتش ناس جامدة يعنى مش اى كلام ........

ودى صور من تصميماتى وممنوع منعا باتا استخدامها وعذرا لو الفلاش ضارب او الالوان مش صافيه اوى الكاميرا كانت بعافية شويه ..














1 comment:

  1. لاااااا بسم الله ما شاء الله حاجة جميلة فعلاااا وهو ده حال اغلب الفنانين فعلااا اظن ان فيلم باللوان الطبيعية عمل نفس الشئ فى شكل درامى

    ReplyDelete