طلبة لوسمحت ....

قضيت خمس سنوات من عمرى فى المدينة الجامعيه وهاهى ذكرياتى باختصار

رحلتى الى المدينة

لاول وهلة تبدو واجهة مدينة الطلبة انها مش بطالة 0لكن بمجرد دخولك والقاءك نظرة على الغرف مش هتقدر تقول غير لفظ واحد واسفة لاستخدامه(ايه القرف ه ) انا هقعد هنا 5 سنين ازااااى مش ممكن ابدا دى وحشه اوى نزلت لاخويا تحت الى كان مستنى يطمن قلت له انا هروح معاك متسيبنيش هنا صعبت عليه واستجاب لرغبتى واول اسبوع فى الكلية بدات اسافر كل يوم من الكليه للبيت لحد ما تعبت جدا واستسلمت لقدرى0

اول يوم فى المدينة بدات اظبط اوضتى وحاولت بكل الطرق انى اخليها اوضه حلوة وجميلة وعسوله والحمدلله وكان شركائى فى الاوضه 3 بنات كويسين وبدات اخد جولة فى المبنى الى بيضم طلبه فنون بس ودى طبعا ميزة وبعد فترة مش كبيرة اتعرفت على كل البنات الى فى المبنى هما بنات من مختلف المحافظات من قبلى لبحرى واوقات فراغى كنت اتنقل بين الاوض نحكى شويه بنات باه ههههههههههههه لحد ما تعرفت واتقربت اوى من مجموعه بنات معينه كانو رفاقى لاخر يوم ليا فى المدينة منهم اكبر والاصغر الى لسه هيجو احلى صحبه واحلى بنات واحلى طلبة تطبيقيه وجميله وفنيه بجد وحشتونى

لحظات لا تنسى

1. لما كنت انا ودعاء بنطلع على السطح نتفرج على المطرة وهيه نازله مباشرة علينا والبرق والرعد كنت بترعب من شكله بس كان جميل وكانو يقولو علينا مجنانين كنا كده فعلا وليلة الامتحان لما كنا نتمشى فى وسط البلد

2. ايام الامتحانات لما يجيلك عشا فاخر معمول من ايدين مامة واحده صحبتنا سخن جاى دليفرى مخصوص للطلبه الكادحين الى بيذاكرو ومنزلوش بيتهم من اسبوعين او اكتر مش هنسى يا شوشو المنبار بتاع مامتك كان جميل

3. رمضان فى المدينة ليه طعم مختلف تماما كله بينزل وقت الفطار وتلاقى طابور طويل زى بتاع العيش كدا ونتسلى باه اننا نقعد نهزر مع بعض اهو نضيع الوقت

4. مش ممكن انسى صوتى النشاذ الى كنت بدندن بيه باغانى كنت بحبها وكانو صحابى بيستحملونى ازاى مش عارفه برغم ان ساعات كنت بصحيهم من احلى نومة بجد انا اسفه وشكرا انكو استحملتونى وكانت اغنيتى المفضله (انا هيفا انا من غيرى انا حبيبك انا من غيرى مين ) ههههههه هيافه فعلا ههههه

5. اول يوم اعيط فيه اووى كان يوم فراق مجموعه بنات من تربيه فنيه فى اخر السنة كانو من دسوق معرفتش اذاكر خالص بعدها ب3 ايام رغم ان كنا فى ايام الامتحانات لكن كنت حاسة انى مش هشوفهم تانى وحصل فعلا
6. لكن بعد كدا مبقتش اعيط جايز اخدت مناعة محنا كل ترم بنسيب بعض ونرجع تانى

7. الشعريه بتاعت مى كانت بتعملها لما كنا بنجوع الساعه  2 بليل ومفيش اى حاجه تتاكل غيرها واو كانت بتبقى جميلة كانت بمثابة اكلة كباب سخن وانت جعان والله كانت جميلة

8. تجمعنا ايام الامتحانات ومذاكرتنا لبعض ومساعدتنا لبعض وغادة الى تعبت معايا اوى فى الرسم الهندسى ويوم الامتحان قابلتنى تطمن قلتلها متقلقيش هنجح بامر الله ههههههههههههههه

9. اسامة منير وبرنامجه بتاع بليل كدا كنت ترمى الابرة فى المدينة ترن كله مركز اوى وكل الاوض مشغلاه وقاعدين يسمعو المشاكل وحكاوى البنات المسهوكين الى كلهم واقعين

10. استقبال اى بنت بتيجى بعد الاجازة يا سلام يا هلا يا هلا يا هلا كان جو حلو برده

من الاخر

ايام المدينة لا تعوض ولا تنسى

بعتبرها كنزى الدفين الى مخبياه جوايا ووقت الضيق بطلعه وافتكر الذكريات الجميلة دى

فيها عرفت معنى الصحوبية بجد ومعنى العشرة وانك تعتمد على نفسك اعتماد كلى وجزئ اتعلمت دروس كتيرة وبنيت شخصيتى .

بقلكو يا صحابى بجد وحشتونى وبجد بحبكو وكانت ايام جميلة

وبالنسبة للقارئ ... شكرااا جزيلااا واكيد كل واحد فينا عنده ذكريات الجامعة والمدرسة واول صحاب واول حب هههه احم احم مش مهم اخر واحده دى هتبقى فضايح ههههههه 

تابعونا ......