07 August, 2011

كلمة وذكرى

التدوينة هذه قد تراها عجيبة وغريبه ولا قيمة لها ولكنها تواردت الى ذهنى قررت ان اكتبها وان كنت مثلى فشاركنى بما يتوارد الى ذهنك عندما تسمع هذه الكلمات او غيرها حيث كل كلمة لها ذكرى ما لدينا وبالتالى عندما نسمعها تتوارد الى ذهننا هذه الذكرى  

كلب : الكلب الى عض بنت خالى واحنا صغيرين وخدت 21 حقنة يعنى كل ماشاوف كلب احس انه هيجرى ورايا

قطة: القطة الى خربشت بنت فى مدرسة الثانوى اثناء تحية العلم كرهتنى فى التحيه بقيت ابص طول الوقت ع رجلى

رمضان:صلاة القيام امام المسجد اصله بيصلى بجزء كامل

6اكتوبر:ايام المدرسة وكل سنة لازم نرسم موضوع عن 6 اكتوبر وانا رسمى اصله بعافيه شوية

شم النسيم: يوم هايل بحبه اوى وبستناه من السنة للسنة لاننا بنقضيه فى الهواء الطلق

العجلة: لما ركبت ورا اخويا ورجلى اتعورت من العجله الى ورا السلوك الى فيه فتحتلى رجلى كرهتنى فى العجل لحد دلقتى بخاف منه ومبعرفش اركب

جرايد : ايام المصيف فى راس البر وكل يوم الصبح بتاع الجرايد يقول جرايد جرايد

المايك: ايام المدرسة برده لما كنت بطلع فى الاذاعة المدرسية

الهدهد:قصه سيدنا سليمان والهدهد فى سورة النمل من القران الكريم لانى كنت بمثل دوره فى مسرحية المدرسة

الكمان:ايام ثانوى كنت عاوزة اختار موسيقى كنت بشوف صحابى بيعزفو عليه بس قالو الموسيقى صعبه خدى رسم احسن ويارتنى ما سمعت كلامهم

الاتوبيس: اتوبيس 6ج كان احمر كدا اتوبيس عتيق اول سنة ليا فى الجامعه كنت بركبه كنت بخاف اركب المواصلات التانية

الشبورة: يوم الشبورة فيه كنت جامده جدا كنت مسافرة الساعه 6 والسواق طلع بينا وانا فعلا مش شايفه قدامى وكان ماشى بسرعه واهو ربنا سترها

الدش (الى بيجيب القنوات الفضائيه مش الدش بتاع الحمام ): التفافنا حولين الراجل وهوه بيركبه كان حدث ايامها

نجمة:كنت باخد نجوم كتير فى امتحانات المدرسة وممتازة

الدكتور:دكتور السنان مفيش غيره بكرهه اصلى بروحله كتير اوى

أرنب:ملوخية بالارانب طعمه اوى اصلها واعتقد كلنا لما بنسمع كلمة ارنب بيروح مخنا للملوخية

الاسد: حديقة الحيوان طبعا محنا منشوفوش الا هناك

النحلة:قرصتها علطول مهى بتلسع اوى

5 comments:

  1. ذكريات جميلة ..... موضوع شيق

    ReplyDelete
  2. يآآه ع الذكريات :)
    بس بقولك الموسيقى مش صعبة و لا حاجة
    دا الرسم هو اللي أصعب __-__
    هههههههههههههههههههه
    جميلة الذكريات يا أسماء :)

    ربنا يوفقك ع طول ^^

    ReplyDelete
  3. asly ya soso bgd gamd mooooooooooot

    ReplyDelete
  4. هههههههه

    ذكريات لذيذة
    تتشابه فيما بيننا نتذكرها فنفرح وننساها فنغفل عن افضل الايام

    بجد موضوع هايل

    ReplyDelete
  5. انا بقتا عندى فوبيا من الكلاب عشان اخر مره الكلب عض صاحبى برضه
    وانا ماليش فى الرسم بس بعةف على الكمان من 10 سنين وبركب الاوتبيس الاحمر وانا رايح الجامعه
    بس انا طنطا مش المنصورة
    تسلم ايدك مقال رائع والالفاظ جميله
    ادخلى ع الموقع ده وشوفى تقدرى تكتبى فى اى باب
    لو عجبتك الفكرة اعتبرى نفسك من فريق العمل
    Www.3lashanek.com

    ReplyDelete