23 June, 2011

قـصـة زمـالكـويـة مـنـفـسـنـة

نبتدى منين الحكاية زمان زمان وانا صوغننة  من لما وعيت عالدنيا لقيت بابا حبيبى زمالكاوى صميم واخويا اهلاوى متعصب ممم طب بالعقل والمنطق كدا اسمع كلام مين وامشى ورا مين بابا طبعا هوه بابا هيغلط يعنى ومن يومها بحب اللون الابيض ومبحبش الاحمر بحب الفانلة ام خطين حمر زمالكوية انا وافتخر ده احنا فريق جامد وشديد عريق واصيل نادى الكبااار يا بنى ادمين

كل ما اكبر شويه بشوية الاقى ناس كتير اهلاوية وانا زمالكوية حسيت بتميزى وبتفرد ناديى المفضل هيه الناس دى اصلها مبتفهمش فى الكورة وبيشجعو نادى الاهلى الى هوه نادى الشعب اهئ اهئ اهئ بس اما كبرت عرفت الحقيقة المرة النادى الاهلى فريق جبار فريق كبير فريق عظيم اديله عمرى وبرده قليل صحيح فريق جامد اوى ونادى عريق اوى .
ومع نموى المستمر اهلاوى زمالكاوى عاملين خناقة عنيفه بين الصابونة والليفة وماتش الاهلى والزمالك ده يا سيدى انا حدث مهم جدا وخاصة لما حد يغلب مش يتعادلو بتلاقى الدنيا مقلوبة

وصلت لمرحلة انى مبقولش انى زمالكوية هاخد تريقه للركب ومش هخلص واصلى مش هعرف ارد هقول ايه اصل كنا نادى بطولات عاملين زى المصرين الى بيتكلمو عن تاريخ اجدادهم الفراعنه الكبار لكن هما عملو ايه ولا حاجة
قلت مش لازم اخبى وادارى فيها ايه يعنى لما بقالنا 6 سنين مخدناش بطولة وفيها ايه يعنى لما اغلب الماتشات الاخيرة بينا وبينا الاهلى مغلوبين وفيها ايه برده لما نتسك 6 اجوان مرة واحده والمقولة الشهيرة بيبو وبشير بيبو والجون وبقول فى سرى هيجى يوم وهنكسب هيجى يوم وهناخد الدورى اه بقالى سنين بهاتى مع نفسى ومع كل الاهلوية صحابى وقرايبى ومعارفى وبتمنى من كل قلبى اى ماتش للاهلى يتغلبو ولو كان مع تونس ولا الجزائر اعمل ايه اصلى زمالكوية منفسنة مش كل الزمالكوية كدا بس انا كدا هتغير امتى مش عارفه جايز بعد 6 سنين كدا اما نكون احنا المركز الاول والاهلى الثانى يصعبو عليا باه اشجعهم

فرحت اوى بحسام حسن وابراهيم الاخوة التوام ياااااه كنتو فين من زمان عاوزين روحهم الحلوة تنتشر فى الفريق والحمدلله ماشين حلو اوى فى الدورى السنة دى مش بالعادة طبعاااا ووجود اللعيب المزيكا شيكا شيكا الجمهور بيشجع ويقول الشعب يريد الدورى يا عميد  وكنا طول الدورى المركز الاول والاهلى الغلبان بيصارع عشان يحصلنا بس يا فرحة ما تمت هوه فوق واحنا تحت يا سبحان الله دول ولاد ايه محظوظين اكييييييييييييييد علطول بيجيبو جون فى اخر كام دقيقة وفى الغالب لو كانو مغلوبين فى الماتش بيغلبو وبفارق اجوان كمان ما شاءالله عليهم طبعا انا بحسد وبنق جايز عينى تصيبهم ههه

بس برده هناخد الدورى منكو يا اهلوية الدورى السنة للزمالك انا بقولكو اهو سامعين شايفين هناخده يعنى هناخده هه هه وكما قال الشاعر فى اغنية نانسى عجرم الشهيرة اه ونص دى حاجة متعبة اكمنى طيبة مستحملاك وبقالى كتير حبيى شوف انا صبرت كام سنة خدت وقت معايا كتير عاوزين الدورى خليكو حلوين باه
هناخده الناس زهقت من الاهلى اصلا وعاوزين تجديد بقالكو كام سنة المرة دى الدورى لينا
وحياة كل دمعة نزلت على خدى لما كنا بنخسر وحياة كل تريقه كنا بنسمعها من اى اهلاوى وحياة السنين العجاف الى فاتو الدورى ليييينا يا اهلوية

3 comments:

  1. جميل أوي بس والله لو قعدتي تدعي العمر كله راحت خلاص يا أسماء الدوري راح منكم وكل دوري وإنتي طيبة وأحسن علشان تغيري بقى الفريق التعبان ده اللي بيلعب بقالو سنين مفرحش مشجعينة بأي بطولة بس المقالة دمها خفيف بجد ضحكت كتير قوي
    عمرو جلال
    أهلاوي مش غاوي كورة بس شرير

    ReplyDelete
  2. بجد يا أسماء احنا زهقنا بقه
    أنا بخاف أقول إني زملكاوية
    عايزين الدوري بقه عشان نحس بالثورة
    يارب الدوري يااااااارب

    ReplyDelete
  3. عمرووووو باه كدا لا لا مش هغيره ابدا ابدا سارة انتى طلعتى زمالكوية نفس الدمااغ يعنى يا لهوتى بينى وبينك احنا هناخد قلم والمركز التانى بامتياز

    ReplyDelete