قـصـة زمـالكـويـة مـنـفـسـنـة

نبتدى منين الحكاية زمان زمان وانا صوغننة  من لما وعيت عالدنيا لقيت بابا حبيبى زمالكاوى صميم واخويا اهلاوى متعصب ممم طب بالعقل والمنطق كدا اسمع كلام مين وامشى ورا مين بابا طبعا هوه بابا هيغلط يعنى ومن يومها بحب اللون الابيض ومبحبش الاحمر بحب الفانلة ام خطين حمر زمالكوية انا وافتخر ده احنا فريق جامد وشديد عريق واصيل نادى الكبااار يا بنى ادمين

كل ما اكبر شويه بشوية الاقى ناس كتير اهلاوية وانا زمالكوية حسيت بتميزى وبتفرد ناديى المفضل هيه الناس دى اصلها مبتفهمش فى الكورة وبيشجعو نادى الاهلى الى هوه نادى الشعب اهئ اهئ اهئ بس اما كبرت عرفت الحقيقة المرة النادى الاهلى فريق جبار فريق كبير فريق عظيم اديله عمرى وبرده قليل صحيح فريق جامد اوى ونادى عريق اوى .

ومع نموى المستمر اهلاوى زمالكاوى عاملين خناقة عنيفه بين الصابونة والليفة وماتش الاهلى والزمالك ده يا سيدى انا حدث مهم جدا وخاصة لما حد يغلب مش يتعادلو بتلاقى الدنيا مقلوبة

وصلت لمرحلة انى مبقولش انى زمالكوية هاخد تريقه للركب ومش هخلص واصلى مش هعرف ارد هقول ايه اصل كنا نادى بطولات عاملين زى المصرين الى بيتكلمو عن تاريخ اجدادهم الفراعنه الكبار لكن هما عملو ايه ولا حاجة

قلت مش لازم اخبى وادارى فيها ايه يعنى لما بقالنا 6 سنين مخدناش بطولة وفيها ايه يعنى لما اغلب الماتشات الاخيرة بينا وبينا الاهلى مغلوبين وفيها ايه برده لما نتسك 6 اجوان مرة واحده والمقولة الشهيرة بيبو وبشير بيبو والجون وبقول فى سرى هيجى يوم وهنكسب هيجى يوم وهناخد الدورى اه بقالى سنين بهاتى مع نفسى ومع كل الاهلوية صحابى وقرايبى ومعارفى وبتمنى من كل قلبى اى ماتش للاهلى يتغلبو ولو كان مع تونس ولا الجزائر اعمل ايه اصلى زمالكوية منفسنة مش كل الزمالكوية كدا بس انا كدا هتغير امتى مش عارفه جايز بعد 6 سنين كدا اما نكون احنا المركز الاول والاهلى الثانى يصعبو عليا باه اشجعهم

فرحت اوى بحسام حسن وابراهيم الاخوة التوام ياااااه كنتو فين من زمان عاوزين روحهم الحلوة تنتشر فى الفريق والحمدلله ماشين حلو اوى فى الدورى السنة دى مش بالعادة طبعاااا ووجود اللعيب المزيكا شيكا شيكا الجمهور بيشجع ويقول الشعب يريد الدورى يا عميد  وكنا طول الدورى المركز الاول والاهلى الغلبان بيصارع عشان يحصلنا بس يا فرحة ما تمت هوه فوق واحنا تحت يا سبحان الله دول ولاد ايه محظوظين اكييييييييييييييد علطول بيجيبو جون فى اخر كام دقيقة وفى الغالب لو كانو مغلوبين فى الماتش بيغلبو وبفارق اجوان كمان ما شاءالله عليهم طبعا انا بحسد وبنق جايز عينى تصيبهم ههه

بس برده هناخد الدورى منكو يا اهلوية الدورى السنة للزمالك انا بقولكو اهو سامعين شايفين هناخده يعنى هناخده هه هه وكما قال الشاعر فى اغنية نانسى عجرم الشهيرة اه ونص دى حاجة متعبة اكمنى طيبة مستحملاك وبقالى كتير حبيى شوف انا صبرت كام سنة خدت وقت معايا كتير عاوزين الدورى خليكو حلوين باه

هناخده الناس زهقت من الاهلى اصلا وعاوزين تجديد بقالكو كام سنة المرة دى الدورى لينا

وحياة كل دمعة نزلت على خدى لما كنا بنخسر وحياة كل تريقه كنا بنسمعها من اى اهلاوى وحياة السنين العجاف الى فاتو الدورى ليييينا يا اهلوية

لــيـــه ........... عــيــب عـلـيـــك

انتشرت فى مجتمعنا المصرى مؤخرا ترديد كلمة التحرش الجنسى فما هو اذن التحرش الجنسى هو اى فعل او كلمة او نظرة قد تؤذى المرأة التى قد تكون زوجتك أو بنتك أو صديقتك أو أختك أو والدتك وليس التحرش بالمرأة فقط بل مؤخرا ظهرت اكثر من حالة فى مصر (التحرش بالاطفال ) وتلك كانت الطامة الكبرى وهى ما يثير الاشمئزاز ويقشعر له الابدان .

هنا ساتحدث بشكل خاص عن المرأة التى قد تتعرض للايذاء فى أى عمر كانت وبأى ملابس ترتدى وعلى أى شكل حتى تكون من يتحرش بالمرأة يفعل ذلك لمجرد أنها امرأة واذا سمح لى ان أقول ومن يفعل ذلك فاقد لكل معنى الرجولة وفى نظرى يفقد انسانيته ايضا فما هوه الا آلة يسيطر عليها غرائزها ورغباتها او قديكون شخص مريض نفسيا وبلا أخلاق اذن فمن المحال ان يكون انسان طبيعى

مثلا ذاك التحرش الجماعى الذى حدث فى مصر منذ ما يقرب من عامين فى العيد فى شارع جامعة الدول العربيه كان شئ مفجع ومفاجئ يكمن فى جرأة هؤلاء الشباب الذين انقضوا على بعض الفتيات ومزقوا ملابسهن وكأن هذا المشد بعض الحيوانات انقضت على فريستها لتنهش لحمها كانت صدمة للمجتمع وأصبح من الضرورى علينا مواجهتها ومعرفة اسبابها وحلها فهل يعقل أن يحدث هذا فى مصر المحروسة ؟!

ماهى الأسباب اذن لتلك الظاهرة :

انا شخصيا لا ادرى فكلما فكرت فى سبب يجعل هؤلاء المخلوقات  هنتفق اننا نطلق على الى بيعملو كدا مخلوقات (لانهم بالطبع لا يمكن ان نطلق عليهم كلمة الرجال لأن الرجولة أخلاق وهؤلاء يفتقدو الأخلاق ) لماذا يفعلو ذلك اعتقد انها الأخلاق ثم الأخلاق

قد تفكر بانهم ينظرون للمراة وكأنها سلعة او جسد فقط او كما يقولون ملابس المرأة ضيقة  تتوارد الى ذهنى مشاهد افلام الابيض والاسود الرائعة وملابس الفنانات التى كانت سائده فى ذاك الوقت فى الستينات  ولم يكن يتعرضن للتحرش .والتحرش بالاطفال هل ايضا يتحرشوا بهم لانهم يرتدون ملابس مستفزة ضيقة؟ ! اذن هذا ليس سبب مقنع .

لا يمكننى ان احكم على الفتاة بمظهرها وان كانت ترتدى ملابس ضيقه كما يقولون هرد عليهم واقولهم وانتو مالكو ؟ هل ده يديك الحق انك تضايقها ؟ او تعاكسها او تنظر لها نظرة تهينها ؟ .

وتلاقى رد مستفز اصل البنت بتحب تتعاكس وانت عرفت منين يا عنتر زمانك عملت استفتاء مثلا ولقيت البنات قالو انهم بيحبو يتعاكسو وليه لما حد يضايق خطيبتك تضربه ليه مش خطيبتك بنت وتحب تتعاكس طب متقوله شكرا انك عاكستها اما انكو متناقضين صحيح.؟!

كم تعجبت عند رؤيتى بعض المخلوقات بدقن (راسه خارجه من العربيه وباصه على الرايحه والى جاية ).

او سبب  اخر يقولون عدم الزواج  واحد من الاسباب  اذن هم مخلوقات لا يعمل عقلهم فقط تتحكم فيهم غرائزهم هوه ايضا سبب غير مقنع لى .

هناك البعض يرجع السبب وراء هذا الى انتشار الانترنت ومشاهده المخلوقات لافلام اباحية وهذا يرجع الى قله الاخلاق

او كما بات واضحا انتشار ادمان المخدرات وما يترتب عنه من ان الشخص بيكون غير واعى ومغيب ومشعارف بيعمل ايه طب وهيه انتشرت ليه مهو عشان الشباب ضعيف النفس بياخدها متخيل انه هينسى حالته ووضعه السئ الى اتخرج ولسه عايش عالة على بابا وماما وقاعد فى البيت او على القهوة.

اذن فالسبب الرئيسى الأخلاق ثم الأخلاق ثم الأخلاق ...

اذن الشعب يريد ثورة اخلاقية

الشعب يريد الأمن والأمان اين ذلك الشاويش الذى كان يظهر فى أفلام اسماعيل يس وينطق جملته الشهيرة (هــا مـيـن هـنـاك )  الى بصوته وشنباته يخض اى حد ماشى محتاجينه فى شوارعنا ليمدنا باحساس الامان وليخيف كل ما تسول له نفسه ايذأنا

بالنسبة لقانون التحرش الجنسى فى وجهة نظرى الضيقة ليس رادعا ليس لعقوبته ولكن فى تطبيقه كم فتاة ستذهب لتحرر محضرا انها قد تعرضت للتحرش ؟! طبعا عرفت الاجابة وهيه ان كان مفيش فهتكون واحده ولا اتنين وكيف تثبت ذلك ايضا ان نظر لها مخلوق نظرة مهينة كيف ستذهب تحرر محضرا تقول فيه ماذا (اصله بصلى بصة وحشة ) ولا عاكسنى فى الشارع .

الشعب يريد تشغيل الشباب يمكن ان يكون هذا سبب فى تبويظ دماغ الشباب مهم فاضين طول الليل والنهار عالقهاوى قاعدين وعالنت قاعدين وفى الشوارع منتشرين اذن الشعب يريد تشغيل الشباب استغلال طاقتهم فى أشياء تفيد وتنمى البلد افضل من جلوسهم بالمقاهى ومضايقتهم للمارة (مهم فاضين باه ).

نتفائل ونفكر ان بلدنا محتاجانا وبلدنا هتبقى احلى بينا وهتتغير لما كل فرد فى المجتمع يتغيرابدأ بنفسك باه وقول لنفسك وكررها فى سرك من انهرده انا مش هضايق اى بنت هتلاقيك طبقتها فى الواقع

عيب عليك لما تعاكس بنت أو تضايقها وخليك عارف كما تدين تدان الى بتعمله فى بنات الناس هيتعمل فى بنت انت تعرفها يبقى ليه تعمل كدا من الأساس واذا كنت ضعيف لما تشوف بنت مثلا لازم تعاكسها اتحكم فى نفسك يا اخى هتبقى فى الاول صعبه عليك  على اساس انك مش متعود بس حط فى بالك انك انسان وليك عقل وتقدر تتحكم فى ردود أفعالك وانك مش حيوان ميعرفش يتحكم فى تصرفاته .

بالنسبة للبنات متخافوش يا بنات الى يكلمك اديله فى سنانه ومتخافيش وتمشى شكيه بالدبوس اضربيه على راسه اديله عقاب رادع فى وقتها خدى حقك ومتسكتيش .

أنــا كـده مـلكـة زمـانـى وببساطة لـسـة مـأنـش أوانـى

يتيمز مجتمعنا الشرق أوسطى ببعض المعتقدات والأعراف الى باللفظ العامى عفا عليها الزمن معتقدات بالية وقديمة .

منها ما يمس الفتاة الشرقية العربية والمصرية تحديدا فى ما يتعلق بالزواج فمجرد وصول الفتاة لسن 30 ولم تتزوج يطلق عليها لقب عانس عانس كلمة عنيفة تجرح الاحساس ولابد من الغائها من قاموس العرب فهى كلمة رديئة جدا . وياويلتاه اذا تعدت سن 35 فهى اصبحت خارج الملعب وفاتها قطر الزواج .


من الذى حدد سن الزواج المناسب او سن العنوسة هل مثلا وارد فى الدستور او فى قانون ما او حتى فى دين ما الاجابة طبعا لاااااا شئ من السابق اذن من انتم ؟


وتؤثر تلك المعتقدات على معظم الفتيات وتصبح يائسة ومحبطة من نظرة المجتمع لها وتخاف ان تصل لهذا السن ولم تتزوج وهذا فى الغالب يؤدى بها الى انها تقبل باى عريس والسلام لتتحول من لقب عزباء الى متزوجة واذا حدث مالايحمد عقباه وطلع عينك العريس ده بعد كدا هيفيدك بايه كلام النااس وقتها الى يمشى ورا كلام الناس يروح فى الهساس .


ولو عملتى كدا ياريت متجيش بعدها وتقولى كنتى فين يا لا لما قلت اااااه


ببساطه يا بنات وببساطة يا نااس البنت الى حكمتو عليها انها تاخرت فى سن الجواز او فاتها القطار هوه الى لحقو القطار عملو ايه هاتولى واحدة لحقت القطر ومش عاوزة تنزل منه ؟


متقلقوش يا بنات ومتخافوش انتو كدا ملكات زمانكو ولسه مانش اوانكو ودى مش وحاشة منك ولا غلاسه ولا قله تعليم ولا قلة اخلاق ولا اى حاجة خالص انتى بنت زى الفل وعشرة على عشرة بس لسه الشخص المناسب الى ربنا عاينهولك مجاش وقته لسه حبة جايز يكون واقف فى اشارة ولا مشغول فى موضوع كدا هيخلصه ويجى علطووول


ربنا كاتب لينا كلنا الخير وعاين نصيبنا الحلو ياريت باه كل بنت تقرا البوست ده تقول ورايا

أنـا كـده مـلـكـة زمـانـى وبـبـسـاطـة لـسـة مأنـش أوانـى