07 August, 2011

يعنى ايه كلمة (وطن) ؟؟

فكرت فى معنى كلمة وطن وانتماءك لوطنك خصوصا فى الفترة الاخيرة والظروف الحاليه التى تمر بها مصر ما بعد الثورة طب يعنى ايه وطن وهل انا عندى انتماء لوطنى وبحبه ولا لا ؟ انا معنديش اجابة بس هقول الافكار الى تواردت الى ذهنى لما فكرت فى يعنى ايه كلمة وطن
بداية فى برنامج على قناة المصرية بيستضيف المصرين المقيمين بالخارج وفى الاغلب المقيمين فى بلاد اوروبا والدول المتقدمة
يجى ضيف ويقول مصر بحبها اوى الى يشرب من مية النيل لازم يرجعلها تانى ويسال المذيع اخر مرة كنت فى مصر امتى يقول 18 سنة !!! نعم 18 سنة وبتقول بحبها طب ازاى فى حد يحب حد يسيبه 18 سنة ؟
يجى ضيف تانى يقول مصر ده بلدى وام الدنيا واحسن بلد فى العالم واطيب شعب يسال المذيع برده طب اخر مرة نزلت امتى يقول منزلتش من 20 سنة !!!!!! نعم 20 سنة واحسن بلد فى العالم لما هيه كدا سبتها كل ده ليه؟
اكيد انى استفزيت من البرنامج ده وبطلت اتفرج عليه انا وجهة نظرى ان بلدك يبقى تعيش فيها بتحبها يبقى تقيم فيها وتحبها عن قرب مش من بعيد لبعيد طب الناس المقيمة فى الخارج ده بتحب مصر فعلا وهل هيه وطنية فعلا انا شايفه انها لا مصر زيها عنده زى اى بلد تانية ولو مصر بتولع هوه مالوش دعوة مهو مش حاسس بيها ولا مقيم فيها هوه عايش بعيد مرتاح ومقضيها اراء فى الشاشات .
طب نيجى باه للمقيمين فى دول الخليج وانا شخصيا اعرف ناس كتير منهم يعنى مبينزلوش الا كل كام سنة وللشديد الاوى كمان يعنى حد مات او فرح حد او وحشوه اوى اهله ونازل يشوفهم (مع اعتراضى على الاخيرة ده لانه مع الوقت بيتعود ع الغربة وانه ميشوفش اهله ومع الوقت بيصبح جاف شويه ) اكيد مش كلهم بس فيه منهم كدا .
طب نبص باه لما ينزلو مصر  يعترضو على كل حاجه ويستغربو احنا عايشين كدا ازاى البلد مش نظيفة وزحمة ومش عاجبهم اى حاجه لانهم بيقارنوها بالبلد المقيمين فيها ؟ طب دول بيحبو مصر وعندهم انتماء ولا لا ؟

الى عايشين فى مصر باه هما كمان مش عاجبهم حال البلد وقرفانين وتعبانين وفى رايى بحس ان مصر بتعاقبنا عشان اتولدنا مصرين واكيد للاسباب دى وغيرها الناس عملت ثورة لانهم بيحبو بلدهم وعايزنها تبقى افضل واحلى .

فى نسبة تانية اغلبها من الشباب العاطل الى حاله يصعب على اى حد لما يكون خريج كليه ومتعلم ومعاه كورسات وشهادات ومش لاقى شغل ده بيتمنى فرصه بس للعمل فى اى بلد ويثبت نفسه وبيكون عاوز يخرج منها مهو بالعقل والمنطق هيقعد فى بلده يعمل ايه يهش ذباب مثلا ولا ايه لازم يدور على عمل ويلاقى نفسه ويبدا يشق طريقه فى الحياة ومتقوليش بيروحو بره يغسلو اطباق لا دى نسبة بسيطة منهم الى بيعمل كدا والباقى بيلاقى فرص عمل كويسه ومناسبة ليهم طب ده عايش فى البلد وبيدور يخرج بره ده عنده انتماء ولا لا ؟

انا امبارح كنت راكبة تاكسى وفضل يلف بيا فى بلدى شويه المشوار كان بعيد حبه عديت على الشارع الى كنت باخد فيه دروس فى ابتدائى وعلى مدرسة ابتدائى واعدادى وعلى المكان الى اتعورت فيه ووقعت وعلى النادى الى كنا بنتجمع فيه انا وصحابى وكانت ابتسامة على وجهى لانى برجع تانى لذكرياتى وحسيت انى دى منطقتى ودى بلدى برغم انها وحشه بس بحبها عشان فيها كل ذكرياتى الحلوة والوحشة طب هل ده معنى كلمة وطن ؟

انا بجد مش عارفه يعنى ايه كلمة وطن وسيظل السؤال الابدى يعنى ايه كلمة ( وطن )؟

12 comments:

  1. أنا سفرت بره بعد مالمرمطة اللي الواحد اتمرمطها في بلده علشان يلاقي شغل محترم ولما أتقفلت في وشي كل السكك سفرت الخليج صحيح بترمط برضه (مش قاعد بدلع هناك) بس على الأقل باخد مقابل يعيشني عيشة محترمة بين الناس وعلى رأي قول الشاعر اللي مش فاكر إسمه قرشك وطنك :)

    ReplyDelete
  2. صحيح انا سمعت المثل ده قبل كدا ربنا يوفقك يا عمروووووو

    ReplyDelete
  3. شكراً شكراً يا أسما :)

    ReplyDelete
  4. يقولون عن الوطن إنه هو المكان الذي تنتهي فيه كل محاولاتك للهروب
    و قالواعنه إنه المكان الذي يوجد فيه من تحب :)
    في الحقيقة الوطن عامل زي الحب ...ملوش تفسير منطقي يقبله العقل
    بس هو حاجة بنرتبط بيها روحيًا و جسديًا...
    ممكن الناس اللي سافرت برا مصر تبقى بتحب مصر فعلاً...الوطن له مكان في قلبنا
    و حب الوطن من الإيمان ...
    حتى الرسول صلى الله عليه و أسلم كان بعيد عن وطنه (مكة المكرمة) فترة...هل دا معناه إنه مش بيحبها ؟
    لا أبدًا ! لكن أحيانًا الظروف بتخلي الإنسان يبعد عن وطنه لكن صدقيني اللي بيحب وطنه فعلاً هيرجع له يوم من الأيام و يستمتع بيه حتى و لو لفترة قصيرة :)

    مقالة جميلة أوي يا أسماء
    تسلم ايدك :)

    ReplyDelete
  5. الوطن عامل زى الحب ملوش تفسير منطقى يقبله عقل بس هوه مرتبط بيها روحيا وجسديا حلو اوى التعليق ده يا ساؤة تسلمى يا حبى

    ReplyDelete
  6. الوطن هو شعور بالحب والعزه والعداله والكرامه والحريه والإنتماء

    ويمكن عشان الظروف اللى الناس عايشاها مش قادرين نحس

    يعنى إيه كلمة وطن!!

    ======================

    مقال وأفكار وأحاسيس جميله :)

    ReplyDelete
  7. This comment has been removed by the author.

    ReplyDelete
  8. This comment has been removed by the author.

    ReplyDelete
  9. ناس اقول الغربه مًره بس أحسن عشان قرشين

    وناس تقول دى بره أحسن يا ريتنا كنا متغربين

    ناس تقول غربه وسفر باب نجيب منه قرشين

    وناس تقول أهلى وحبايبى أغلى من الملايين

    وناس تقول الغربه حلوه وعمر يعدى مش حاسين

    وناس تقول فى بلدنا أحلى حتى لو أكلنا طين

    عرفت ليه يا بلدى أسمنا مصريين

    عشان بنتعب معاكى أوى فى الحالتين

    مع أنى بتمنى حضنك يضمنا وما نكونش ليه مفارقين

    =============================

    ReplyDelete